上星期讲过一个雪糕嘅故事，咁今次就讲下一块布景板嘅故事啦。呵呵，搞到好似成个讲故佬咁哦。

话说上周日，係中山大学管理学院又一届毕业生影毕业相嘅大喜日子。布景板手捧一大扎香槟玫瑰赶到现场，引起全场哗然。花送出后，布景板开始从事佢嘅主营业务——与人合照，与各式各样嘅人，影唔同组合嘅合照。好彩布景板并唔係好红好受欢迎果种，所以都係有限影姐。喺人群中穿梭期间，布景板仲兼职咗一下保姆、摄影师、催场工作人员。毕业啦，大家都好开心，我都好兴奋，明年又轮到我咯。

本来天气几好，唔会好晒又无落雨，温和嘅阳光中略带有一丝雨后嘅清爽。但正准备召集博士影相嘅时候，老天突然唔高兴啦，脸一沉，乌云盖顶唔止，仲有啲打雷，瞬间雨水好似倒水咁洒落嚟。大雨嘅清场作用好强，一下子挤满人嘅草坪、校道就变得空空如也。好彩我哋大部分人都有备而来，然后再躲到大树下避一避。我哋嘅院领导都算敬业，冒雨坚持影完各种pose；佢哋都几惨，上年就喺烈日下晒咗一个上午，今年就淋到一身湿。博士嘅毕业相可谓有趣，不止背景诡秘仲滂沱大雨，睇嚟真係要好好ps一下啦。最后，我拿咗两支花翻宿舍，其中有一支仲係院长转送嘅，呵呵呵。

雨越落越大，躲喺树下根本解决唔到问题，两个人一把遮亦根本无济于事，于是我哋去了图书馆避雨，行进中就更湿啦...好，总结一下，布景板今日嘅最大遭遇就係：全湿了！膝头以下彻底湿透，上身亦大面积不同程度淋湿，唉...

一年一度嘅百歌又到咯！回想起身，过去四年我都有参加哦。头两年喺珠海，规定每个班都要组织合唱，我哋班通常表现都比较一般，而A班喺田田等人嘅带领下，每次都会搞搞新意思，几有睇头。后两年喺南校区都係同院庆一齐搞嘅，大三无缘无故被拉去小组唱，见识到现代嘅录音室及其高超技术，玩咗一次假唱；大四果年，大家自编自导自演咗一个反映大学生活嘅话剧，效果好唔错，係我最开心、最满意嘅一次。

今年百歌再次同院庆分离，仲移师东校区添，我哋级都有排咗一个节目去表演。参加过四年，今次都好想去凑下热闹，况且我又未去过大学城，于是就约埋曹曹一齐去。飞子作为工作人员中午已经跟埋大部队过咗去啦，下午仲要彩排之类，我同曹曹就下午上完课自行前往。地铁四号线停运嘅谣言满天飞，我哋坚信网上嘅新闻，依然选择地铁，实践证明我哋係啱嘅。由于小猪嘅加盟，我哋放弃咗子龙话派个靓仔师弟嚟接我哋嘅安排，真係可惜哦。琴晚好冻哦，我哋都将最厚嘅衫穿上。落咗地铁，从地下登陆，天已经黑晒啦，放眼望去，有路、有灯、有楼、有树，就係无人！第一感觉就係：好荒凉哦～咩山卡拉地方啊～单个方向四车道，我哋三个就霸咗一条车道，因为隔咗个绿化带嘅人行道实在太阴森啦，偶尔有一两部车喺旁边飞驰而过，都无点感觉到有生命危险。最显得无聊嘅係果啲红绿交通灯，自己孤寂咁闪嚟闪去，根本无车可指挥。

行咗20分钟左右，终于到达中大地头。到处都好有珠海嘅感觉，地大、楼疏、人少，所以每栋建筑都可以做得好宏伟，尤其係个图书馆，连室内停车场都准备好啦，不过里面嘅馅如何我就下次再探啦。由于惊落雨，晚会移咗入我哋学院仲搞紧内部装修嘅行政楼。场地唔大，地上摆满咗小板凳。一到门口就撞到J老师同子龙，好快就揾到大部队啦。以前百歌，我哋都係合唱为主，再加啲其他副业点缀下，有啲闷。但而家，师弟师妹们好跳得哦～一般都係跳舞为主，民族舞、现代舞、街舞...连黄梅戏都有啊。每个班似乎都有一两个係好跳得嘅，男又有，女又有。仲要都向高难度方向发展，动不动就举高女生，或者女生企喺男生上面。可能年纪大啦，小板凳坐得耐好累，于是同曹曹企埋一边，睇得好兴奋。轮到我哋嘅表演，同上年嘅有啲似，话剧形式演绎×××生活。一出场，以串唱流行歌嚟讲述选导师过程。哈，何B哦！原来何B都有参加，仲要打头阵。嗯，原来何B係咁唱得嘎哦。“卡门”一出场，震惊四座！原来我哋级仲有一个唱美声咁劲嘅女生哦～呵呵，后来得知，原来佢就係成日喺我隔离宿舍练歌嘅人...可能我哋个节目同其他节目相比风格比较迥异，又有咁多流行歌，搞到台下果啲ddmm好high哦。回程一路上，我哋都喺车上唱歌，唱到唔记得词就又换一首，好耐未试过咁玩过啦。

而家好多好玩嘅嘢就会去东校区搞啦，南校区就剩番一班老嘢，闷死啦。以后得闲都去东校区窜窜，揾番啲青春气息，哈哈。