| Jersy's profileJersy说...PhotosBlogLists |  Tools  Help |
|
|
11/7/2007 色|戒大家听到呢个名似乎反应都会好大...琴晚，我提咗一句话今日要去睇，电话另一头嘅cm马上就将音量放大10倍，将音调提高8度：色戒！！把我同宿舍里面其他人都吓咗一跳，本能地迅速将耳塞拔开；cm旁边闻声而至嘅几位男生更兴奋，凑过嚟不停鬼叫：原版？没删减的？哪里有？同学们，至于吗...另外，据我目前所听到嘅，有人话佢係文艺片，有人话係色情片，都算啦，最过分嘅竟然话佢係警匪片...天啊，同学们，疯了吗...
姑且勿论佢係乜片，先睇咗再讲。当然，喺广电总局嘅督促下，大家热切渴望睇到嘅情节会被剪到一啲都唔剩。其实，剩番嘅145分钟已经係一部优秀嘅电影，无论剧情安排、表现手法定係人物刻画、角色演绎都对得住“李安”呢个招牌，只係王力宏原来嘅形象太深入人心，总觉得佢演热血青年有啲搞笑。然而，虽然导演亲自操刀，将剪片对剧情嘅影响减到最低，但剧情都係有啲突兀，点解王佳芝无拉拉就爱上咗易先生？转折点喺边？因乜树会改变？呢啲只能靠我哋自己想象...我哋只能搞笑地臆想为钻石对女人嘅诱惑实在好大，6卡哦...不过我相信，答案肯定唔係咁，而应该就喺剪咗嘅10几分钟里面。而家咁睇，梁朝伟本身亦无乜突破，从无间道嘅卧底变成呢度嘅汉奸，都係咁cool cool哋，玩深沉，话少算计多，时刻警惕，事事小心，心理压力超大。但无间道都可以揾下心理医生，咁呢度就唔使发泄一下？呵呵，应该係有发泄嘅，不过家阵就变得好轻描淡写，要多加留意留意略为体会到。就10几分钟，令到成个剧情变得含蓄咗，角色亦变得压抑咗，有啲嘢要靠观众自己去估；睇嚟李安嘅坚持的确有佢嘅道理，佢要拍嘅确实唔係色情片咁简单...
哎哟，唔知点解，睇完电影翻嚟病情又更加严重啦，成个人晕晕地。但咁早又唔想训觉，先耗耗吧... 10/5/2006 夜宴放假前睇咗夜宴，有人叫我写下评价，咁就讲几句啦。
典型嘅大片，豪华嘅明星阵容，华丽嘅服装、布景，宏大嘅场面。至于剧情，一般咯。而我当时嘅感觉係，唯美，使得剧情嘅发展有令人啲难以理解。反正就係用钱砸出嚟嘅电影啦，同当年嘅卧虎藏龙差唔多啦，想喺外国人面前卖弄一下中国嘅传统特色。
唔记得边个明星讲过嘅一句话：像章子仪这样样貌、身材的女孩子，在中国可以抓一大把。喺呢部戏里面，我充分体会到，无论样貌、身材，甚至演技，佢的确算唔上出众，甚至係好一般。不过，佢有其他人无法比拟运气与机遇，咁就赢晒啦。但我唔明白点解，佢每次古装都係饰演啲咁主动献身嘅角色嘅？
如果话败笔嘅话，我个人认为，係篡位皇叔嘅选角上值得商榷，係咪唔应该用葛优呢？仲有，果句明明话要讲三个字，点知讲咗三个词嘅对白，竟然会喺咁嘅“大片”里面，真係笑死人啦！ 9/13/2006 阴天，阵雨落雨嘅日子，去咗睇东京审判。係一部令人心情沉重嘅电影，甚至唔会因为曾志伟嘅出现而感觉有一丁点嘅搞笑，亦都唔会因为有几个偶像派港台演员嘅参与而显得有些许轻浮。坐喺后面嘅婆婆一边睇一边喃喃自语，谴责片中嘅“死人日本仔”。
如此题材嘅电影，唔敢妄论好唔好睇。只想讲，我睇明白啦。建议大家都睇一下，有可能嘅话去支持一下票房咯。 6/9/2006 蝗虫过境傍晚嘅时候收到一个好令我诧异嘅消息，莫名其妙地，9号达芬奇密码就喺全国落画！太唔正常啦，一般大片都会持续个几两个月嘎，年头King Kong就上咗画成两个月，而达芬奇密码上画一个月都未够。官方所讲嘅原因令我无法理解，至于真正嘅原因我亦不得而知，只觉得中国嘅电影市场还残留计划经济嘅影子，有啲供需不符。好彩我早就睇过，无需急于赶尾班车或者好似King Kong咁饮恨。而小敏就马上打电话去飞扬问时间，并证实了听日果然要落画，消息无误。今朝宿舍楼下嘅公告栏贴出咗今个周末梁銶锯堂嘅电影表，星期日晚继续放达芬奇密码。但係今晚食完饭番去就已经被改成放左麟右李啦。呵呵，我觉得果个消息就有如蝗虫过境，所有达芬奇密码都无一幸免。睇嚟想睇而又未睇嘅国内朋友仔就只净番三个方法：老翻、非法下载、出国睇啦。嗯，以后都係有戏趁早睇啊！ 6/5/2006 POSEIDON 今朝喺车站，赶唔到番学校嘅车，望望表，有排等。见到一部去天河嘅车，突发奇想：不如去睇电影啊，Good idea!
飞扬只有达芬奇密码同POSEIDON，别无选择啦。初时成个影厅只有我一个，呵呵，包厅哦。但由于音响效果太好，音乐又有啲震撼，有啲惊添。电影刚开始，一对情侣姗姗来迟，坐喺我前面两排，还好，视线范围内有人，可以安心睇啦。之前睇poster，知道係一部海难片，以为係好似TITANIC咁，浪漫为主，惊恐为辅。原来我错啦，佢刚好相反。绝境逃难，係何其惊心动魄嘅事情啊。当人面临困境嘅时候，自私同无私都表现无遗。当别无选择时，无可避免地要有所牺牲，纵使对被牺牲者确实好残忍，无论係自愿定被逼。开始时有6+4人一同找寻生路，最后只剩下6个人坐上救生艇等待救援，无论主角定配角，都有可能被牺牲。找寻生路嘅过程中，困难重重，惊险重重，同时亦都体现出人类智慧嘅闪光以及求生嘅勇气。leader好重要，成员嘅配合亦都好重要。然而，只有少数人相信危难即将降临，然后结伴寻找逃出生天；亦因为只有少数人相信，所以相信嘅人先有机会成功逃离死神。现实就係咁残酷嘎啦。换咗係我，我又有无咁坚定嘅信念、勇气与运气呢？呵呵，不过喺咁嘅环境下，死係必然嘅，生先係意外，又有咩好介怀呢。
虽然桥段唔算新，但拍摄效果几好。喺空荡荡嘅影厅里面，我越坐越觉得冻，唔知係剧情嘅问题，定係空调嘅问题啦，心亦越跳越快，好紧张哦。嗯，有时刺激嘅场面过多就会变成惊吓。完场时，终于可以松口气啦，但我觉得有啲晕，脚又有啲软，差啲行都唔识行，好一阵都未能回过神嚟。
番到宿舍，又down咗“ICE AGE Ⅱ”睇，惊险中又带啲搞笑。哈哈，啲动物真係好过瘾啊！
其实本来今日心里面总有啲嘢唔舒服，觉得好唔爽，但睇完呢两出咁生生死死嘅戏之后，觉得已经无咩放唔开，亦都无咩唔可以宽容嘎啦。ok, everythig goes well!听日继续去玩！ 5/26/2006 达芬奇密码 琴日我哋全室不约而同咁穿咗黄色衫加牛仔裤/裙，出现喺篮球场睇比赛，俨然一队啦啦队。但係，全场无论男生定女生都无人发现呢个巧合，失望。可能人有时真係会“视而不见”，就好似果幅“最后的晚餐”。。。
睇咗“达芬奇密码”啦，无咩大期望，自然就唔会有失望。将一个105章嘅小说拍成150分钟嘅电影，情节删减以及改编係意料中事。电影少咗好多带有悬疑、吸引人嘅point，有啲非主线场景基本上都无交代清楚，对于我嚟讲就总觉得剧情进展得好快，好似缺少些什么。不过其实故事大纲都已经算清楚，同其他悬疑片差唔多，而人物刻画亦好恰当。我最欣赏嘅係果个英国爵士书房里面嘅果个屏幕，其先进性令到可以用最短嘅时间、最直观嘅方法使观众理解达芬奇名画“最后的晚餐”内藏嘅秘密，劲！我觉得，小说本身係反基督教嘅观点，里面亦都包含好多宗教历史、象征符号同著名建筑嘅介绍。电影对于前者嘅表现係比较充分嘅，至于后者，可能时间嘅关系就略为欠缺。所以，如果想要原汁原味就梗係睇书啦，如果只係想知道大概或者睇明星嘅话就睇电影就够啦。我去睇电影部分原因都係想去睇下Tom Hanks，嗯，佢老啦，不过演Robert Langdon呢个典型美国式学者仲係卓卓有余嘅。呵呵，不过演Sophia果个靓女真係好美。 12/10/2005 如果·爱 每到考试期间，我都会做一啲奇奇怪怪嘅事情。记得上年差唔多呢个时候，一早起身唔想复习想行街，就一个人去咗中华广场。由于太早，于是就喺寒风中一边睇国际金融一边等开门。逛咗一朝，回程途中，得知CL等归国人士想聚一下，于是一大班人由中大逛到去六中，仲实现咗初中第一届同最后一届8班嘅偶遇。玩咗一日，搞到考国际金融前果晚要通宵。不过奇怪，果晚我哋全室都通宵，简直就係癫咗！
到咗今年，今朝一早俾daddy嘅闹钟吵醒，唔紧要，一如既往咁继续训。训到8点，自己嘅闹钟响，照旧赖下床。过咗一阵，突然好想睇电影，去飞扬睇想睇好耐嘅如果·爱。自从暑假去过一次，觉得好正，就唔想去其他啦。想做就做，马上起身，9点出门，10点咁好到天河城——今次唔使等开门啦。10:30第一场，12点前仲半价，good！第一场连验票嘅人都无，完全可以唔买票啊，不过我係好孩子，唔会咁做嘅。成个放映厅计埋我只有5个人，其他人都坐喺我后面，视线无任何阻挡，爽！我终于感受到之前有人同我讲过嘅果种视野开阔、一个人独享电影嘅感觉啦！不过最讨厌后n排果个uncle不时会打呵欠，果个aunty不时又会评论一下，好彩比较细声。其实一个人睇电影感觉几好啊，特别係睇自己中意嘅电影。不过如果係同志趣相投嘅人睇，应该都会唔错嘅。
讲番部电影，其实我係冲住张学友－歌舞片呢两样嘢去嘅，可能係之前雪狼湖之故吧，睇完都无令我失望，抵佢票房同评价“双赢”啊。我唔係影评人，唔识用华丽嘅辞藻评论太多，我只係觉得每个演员表现都好出色，融合咗电影同舞台剧嘅手法，几有新鲜感。至于故事情节，係果种要带个脑去先可以睇得好明白嘅，但係又唔会太悬，起码我get到佢想讲咩，戏里戏外同一个爱情故事，我中意。发觉周迅真係好精灵，令你一见到就忍唔住中意，但係演贪慕虚荣嘅女人就总係觉得唔到位，总觉得争咗啲嘢，如果刘嘉玲后生啲嘅话去演可能会更好，呵呵。而金城武就依旧有型靓仔，张学友就略显肥同颓废。哈哈，最搞笑池珍熙，开始果时仲以为係发福版李亚鹏，要佢唱中文歌就真係难为佢，不过真係唱得唔错。
除咗无对话字幕，听得比较辛苦之外，成出电影感觉好好。已经爱上咗一大早一个人去飞扬睇自己中意嘅电影，好期待下一部中意嘅电影出现！番嚟之后，将QQ嘅个性签名改成：如果爱，就要坚持；如果不爱，就要放手。引嚟咗唔少朋友嘅关心，非常感激！但係特此声明，纯粹係睇完电影有感而发，唔好联想太多。
唉，下午冲番学校上最后一节全球营销管理，发觉呢科复习超多，想死。。。下星期连考两科，未来boss仲话星期日要开会，崩溃。。。发觉之前浪费太多时间，历史唔会重演挂？要彻底闭关啦！ |
|
|
