| Profil de JersyJersy说...PhotosBlogListes |  Outils  Aide |
|
|
31/07/2007 cousins有时候，唱k唔係为咗唱歌嘅。我就係啦，通常讲嘢多过唱嘢，或者8嘢都得。今次，係专程慰问一下从货车上跌落嚟，行路一瘸一瘸嘅表弟，顺便庆祝一下佢拿到人生第一份工资啦。然后，关键係，顺便发现细佬原来换咗女朋友喔！
有留意佢qq签名档嘅人可能都会好surprise，不过无搞错，就係换咗咯。想起果啲说话，我鸡皮都起晒，而且令我重新认识我细佬，或者讲係从另一个侧面认识咗佢。不过我一直都觉得，签名档果啲嘢，后生仔随便up下嘅姐；就算佢係认真嘅，变数都好多，无需咁在意。
喺我哋屋企人眼中，细佬係个好老实嘅人，用阿嫲嘅说话嚟讲，就係担屎都唔偷食果种。当然，我认为，因为果啲係屎姐，係人都唔偷嘎啦。不过，我承认，佢都属于果种憨厚老实型嘅，即係玩大话骰唔识讲大话，成日俾人开盅嘅果种啊。佢嘅ex-gf，係一个好吵嘅人，係果种无时无刻都绝对无法用斯文大方嚟形容嘅人。我同表弟都怀疑细佬係咪有恋母倾向，因为果个女仔真係好似我阿婶。讲句老实话，我唔係太中意佢，我可以预见到同佢相处唔係一件容易嘅事。不过，呢个係细佬嘅选择，我无必要亦都无权去干涉。佢嘅人生，佢嘅幸福，佢自己扎主意咯。我嘅任务就係，尽量同佢相处好，毕竟以后好可能成为一家人嘛。
哈，剧情峰回路转，而家竟然分咗手。我好衰，心中竟然有啲窃喜。分手之后闪电式换咗一个，呢个唔知点形容，第一次见面，一句说话都无讲过，真係同之前果个形成鲜明对比啊。或者人哋就中意唱歌唔中意讲嘢呢，嗯，拭目以待啦。
讲下题外话。虽然我无乜关心亚洲杯，但我有睇新闻，觉得琴晚嘅体育评论讲得实在太精彩啦！伊拉克赢咗，呢个经常出现係国际新闻嘅名字，今次出现喺体育新闻，仲冠以冠军奖杯嘅殊荣。唔係话伊拉克唔应该赢，而係话其他球队点解会输？其中嘅态度，甚至制度问题，都值得各国好好思考。 28/05/2006 大食会 换咗呢个青bb嘅界面，心情都绿色咗好多。
呢几日不停咁落“龙舟水”，有大有细，落到我心都烦啦。琴晚半夜仲行雷闪电，我係对住窗训嘅，电光将我惊醒，恍惚世界就喺我眼前裂开，吓咗我一跳。雨落得好大，吵得令我不能马上入睡。
前几日师父话再借衫影毕业相，我今次当然唔会错过机会，原本想住一早同飞鸿赶去华农。谁料，天公不作美，雨落个不停。当我行到落停车场嘅时候，收到师父嘅短信：影相活动取消。我晕，早知就唔挣扎得咁辛苦起身啦。ok，咁中午嘅“大食会”时间就唔使咁紧迫啦。上楼后喺沙发摊咗好耐，慢吞吞咁再次出门去表弟屋企。
原计划係表弟一pair买菜，细佬担大旗做大厨，我就负责洗碗（后来加上了飞鸿）。点知，我上车嘅时候接到表弟电话，话佢哋睇紧NBA，叫我哋同佢换，我哋同佢Q去买菜仔。男生真麻烦！好，去就去。喺果头生活咗快10年啦，都唔知下渡果度有个地下市场。。。我一向係啲光明正大嘅人，从来唔搞地下工作嘅。三个臭皮匠，糊里糊涂，又嫌人哋丝瓜生得太巨，又嫌人哋啲虾唔够生猛。好不容易买齐啦，全靠飞鸿同Q，而飞鸿竟然知道大细鱿鱼有咩区别，劲！回程竟然落大雨，三个人两把伞，裤脚全湿了，还好，保住了头。去到表弟家，由于并无啱size嘅裤换，唯有对住风扇狂吹。今日有幸第一次见S（嘘～confidential啊！），感觉几好，但总觉得有啲似。。。婶婶？？难道细佬真係有啲恋母？哈哈。细佬同S喺厨房度玩煮饭仔，整理材料整咗一个钟，嬉戏咗半个钟，煮又煮咗半个钟。我哋就喺外面睇电视、食水果度过呢两个钟。2点钟——係买菜时我预言嘅时间，果然，终于有得食啦！五餸一汤，整得好唔错啊！咁多年嚟嘅锻炼係有成果嘎啊。但由于表弟嘅舒服，放咗米之后唔记得按制，米喺煲里面浸咗成个钟先可以煮，所以水唔够，有啲硬，不过并无影响大家嘅胃口啊。大家边食边讲笑，仲互揭笑料添。饭后就互玩手机，愉快咗一个下午。我哋连下次活动都商定好啦，我又被屈啦，可怜～
见到细佬咁叻，我又想起我唔识煮饭啦。其实对于煮饭，我真係有种后天嘅抵触，箇中原因亦只有我自己明白，好难说得清道得明。 23/05/2006 做大事 喺时候讲下我前两日做咗咩大事啦。如无意外，果个仪式应该叫做打斋。
3个人，口中念念有词（通常都听唔明），敲锣、打鼓又打叉，仲有好多专业用具，成个过程同电视上面果啲差唔多。每隔半个钟念一次，每次又大概半个钟左右，而且每次嘅仪式又不尽相同，有时仲需要我哋配合一下。全过程就大概10个钟，从星期六傍晚到星期日凌晨。我开始怀疑rap係咪起源于中国，佢哋rap嘅功力绝对唔会比果啲国际级歌手差，呵呵。其实唔係话咩宗教信仰或者迷信之类，只係嫲嫲总觉得要做啲嘢先可以令自己安心，令爷爷安息。老人家係咁嘎啦，或者讲中国人都係咁嘎啦，唔知自己信仰咩嘢，就咩都信下咯。我都係第一次参与呢啲仪式，开始好啲惊，不过咁多亲人喺度，好快就无事啦，而且变得有啲好奇。起初敲锣打鼓好大声，后来接近深夜，法师们都会适当地将音量收细，因地制宜嘛。其实依然有啲大声，好彩邻居们无报110姐。不过我最细果个细佬竟然都训得着，果然够猪啊。成晚流流长，法师们就好忙，我哋就事情唔多。而今次嘅气氛係比较轻松嘅，大家都喺房里面有讲有笑，时间都过得好快。11点几果时落大雨，我哋仲冒雨去买咗宵夜添。平时大家都各有各忙，最多逢年过节聚下食餐饭，好少话全家人聚埋一齐，为咗同一件事忙碌嘅。其实呢种共同努力嘅感觉几好嘎，好团结、好温情，遗憾嘅係起因係一件咁令人不愉快嘅事。可能世事真係无完美嘎啦。
所有事完结之后，送走法师，我哋就去饮早茶。6点几饮茶，绝对少有啊。饮完茶，大家都番去训啦，只有我，好可怜咁仲要去帮一个弟弟补课。平时同佢听写英文单词，我都有训觉嘅冲动嘎啦，今次简直就几次想训着，搞到有几次读错单词，又有几次睇错行。好彩弟弟比较insensitive，并无深究。后来轮到数理化问题，我顿时有番精神，还好，无咩点影响智力。中午番到屋企，已经24个钟唔训觉啦。冲完凉食完嘢，2点钟训落床，死猪一样。训咗两个几钟，俾daddy叫醒，原来全家人有去聚餐，挣扎住爬起身。见到嫲嫲了却一件心事之后嘅安乐样，我都好开心。惊闻细佬竟然无训觉，去咗陪女朋友影贴纸相，我佩服得五体投地啊！廿四孝得有啲变态咯。。。
星期一无番学，继续喺屋企昏睡，落雨天最后就係训觉嘎啦，好舒服。 14/05/2006 母亲节快乐 今日係母亲节，妈咪叫我煮餐饭俾佢食。天啊，真係难倒我啦！我就净係识煮饭嘎扎，而洗碗先係我强项啊嘛。刹那间好憎恨发明呢个节日嘅果个人！我恳求妈咪换一样，佢点都唔肯。最后都係契妈救咗我，呼朋唤友一齐出去食饭。夜晚，我就煮糖水俾妈咪食以作补偿啦，嗯，呢样我都整得还可以嘅。其实有时我都好烦，无理由一世都要妈咪煮饭俾我食嘎，以后点算呢？而人遇到复杂嘅问题往往都会选择逃避，我都唔例外，以后嘅事以后再算啦，反正肯定唔会饿死嘅。
祝所有嘅母亲都节日快乐啦！ 24/04/2006 所思所感 世界真係细啊，细得实在离谱！今朝一早坐楼巴出去，遇见一个相熟嘅aunty同佢老公，于是就同aunty吹起水。发现aunty只係周末过嚟番禺呢边度假，平时就住喺爷爷屋企附近嘅单位宿舍。。。同一个单位。。。再惊人发现uncle识得爷爷，仲知爷爷前一排过咗身。。。原来uncle就係爷爷单位嘅工会主席，当日係佢代表工会上去屋企抚恤嘅，我都在场招呼佢。嗯，认真望下佢，真係熟口熟面。佢话追悼会当日都有去，但我就无留意到啦。兜咗咁大个圈，原来同身边嘅人早就认识啦，真係有缘啊！只可惜喺呢个时候先发觉，仲要係一件咁嘅事，真係有啲煞风景。
其实同uncle只係打个招呼，客套咗两句，但係我自己唔知点解就将有关呢件事嘅记忆全部挖番晒出嚟啦。就好似一间啱啱先好唔容易执好嘅房间，俾一个偶然路过嘅小朋友无情咁搞乱番一样，好郁闷啊。无数片段、话语又再闪过，唔识讲咩感觉，反正就唔舒服。不过我对执房总算有啲经验啦，好快又可以执得整整齐齐嘎啦，嗯嗯。
经过一昼嘅调整，下午又可以开开心心咁陪daddy去芳村。daddy嘅嗜好除咗养狗——正确嚟讲係玩狗之外，就有养鱼。我仲买咗一只龟仔去陪屋企果只孤独嘅龟——同伴过唔到冬天，先行一步，佢肯定好寂寞嘎啦，帮佢再揾一个玩伴应该无错挂？小生命们真係可爱啊！
P.S. 朋友在做一个人生抉择，我鼓励佢尝试勇敢迈出第一步，希望佢幸福啦！ 16/04/2006 换一种颜色，换一种心情 骨灰暂存嘅事都搞掂埋啦，呢件总算告一段落啦。一个星期，足足一个星期，世界就唔同咗啦。每个人都喺度适应“少一个人”、“13个人”嘅生活，包括嫲嫲，我觉察到大家都喺度改变。虽然阴影仲係有啲挥之不去，但我已经学会豁然面对。
明日阳光依然灿烂！
P.S.今日去考普通话水平测试，唔使10分钟就搞掂啦。考成点？总算比考英文口语好啦，呵呵。 15/04/2006 伤痛过后 以前总认为，人就住喺果度，想见就有得见，慢慢都未迟，就会变得越嚟越懒。几年前嫲嫲住院，仲发埋病危通知书，但正值高考，当时无人敢话俾我知真实嘅情况，过来我先知道详情，所以感觉唔大。之后婆婆嘅突然离世，令我第一次感受到原来死亡可以嚟得咁快，想见就能见到真係一种幸福。对于婆婆，我更多嘅係同情与怜爱；对于爷爷，更多嘅係亲近与尊敬。今次爷爷住院之后，我懒散嘅心再一次警惕起来。爷爷嫲嫲成日话：你要番学唔得闲就唔使成日嚟啦，病房呢度空气又唔好，对你身体都无益啦，你星期五放学番屋企之前嚟一次就得啦。知道我当时想咩吗？我係惊未等到下个星期五我就无机会啦。。。当然，我唔会讲出口，只係意见接受，行动照旧。有时觉得太累，动摇咗去嘅决心，但当我想到呢次可能係唔知倒数第几次嘅时候，我再累都唔理啦。就上星期五，一日都喺宿舍忐忑不安，唔知做咩。果个垃圾班长团支书会议要5点先开，罗罗嗦嗦，开完都快6点啦，我犹豫咗一下，最后都係决定去，仲带埋应承爷爷帮佢买嘅即冲无糖麦片。估唔到呢次就真係最后一次啦，好彩有去，而且兑现埋承诺，即使佢可能根本未嚟得切食，但係我心里面都好过好多，否则就后悔死啦。咁啱果日係星期五，大家都有去过，都算尽咗心意啦。而家，我明白到想见就要抓紧时间嘅道理，得闲都会去探下嫲嫲。当然，又唔可以去得太频，否则老人家会觉得我哋好奇怪。
每次唔开心，最惨嘅就係我嘅荷包。前几日自己一个人去逛，随便买咗一堆嘢，觉得好爽。其实都係卖果个人推荐咩我就买咩，不过都应该几有用嘅。每到下午四五点，我都会觉得好唔舒服；医院附近嘅路，我亦都好唔愿意去行。fine，我会慢慢去适应嘎啦。而家我会不断咁消化记忆中嘅每一个片段，直到将佢哋喺心里面越埋越深，深到唔会经常隐隐作痛为止。好多谢好多朋友嘅关心，留言、MSN、短信、电话。。。仲有啲意想不到嘅朋友，有好多鼓励，好感动。呵呵，有人同我讲圣经，有人讲电影，有人remind我讲过嘅说话，仲有人讲“英文”添，真有趣。Thank you guys, sincerely!
Hey，人总係要开心咁生活嘎嘛。Trust me, everything is going well. 13/04/2006 泣别 四日四夜，加埋只训咗十几个钟，除咗因为迷信活动嘅需要外，更多嘅係我想陪陪爷爷，唔想训。唔紧要嘅，平时都挨惯嘎啦，大家都好惊讶于我咁挨得。
我得闲都会同爷爷倾计，虽然唔知佢听唔听到，但我就好唔习惯呢种倾计嘅方式，净得我讲，无人回应。我一向怕火，今次我豁出去啦，经常上香、烧纸钱。。。虽然总係蹑手蹑脚、鸡手鸭脚。烧纸钱嘅时候，我好难过，估唔到我第一次俾钱爷爷使係要用咁嘅方式，如果佢能够等多两三年就好啦。而家我已经係折金银锭嘅高手啦，默默咁折，只想为爷爷做啲嘢，不知不觉一大捆纸都折晒啦。我平时好怕鬼嘎，但係今次无论喺医院、屋企定殡仪馆，我一啲都唔怕，即使面对遗体，我就只有伤心；我仲敢行入殓房同爷爷讲再见。而家想起都有啲佩服自己，可能因为係亲人，所以根本唔会怕。除咗第一晚，大家都会轮流训觉。一日一夜无训，嫲嫲硬拉我去爷爷张床度训，细佬问我惊唔惊，其实我根本无想过惊。训喺度，自然会想起爷爷，想起小学果阵每日中午放学番嚟都会同爷爷喺呢度玩牌、玩飞行棋、听故仔——爷爷最中意嘎啦，十几年啦，张床嘅方位同摆设都无变过。自从读中学之后，我就好少番去啦，渐渐变得越嚟越懒。我越想越难过，枕头都湿咗一片啦。可能因为太累，不知不觉就训着咗，一直到早上8点几，爷爷嘅床真舒服啊。
好多亲朋好友、街坊工友都会嚟上香，讲起爷爷嘅往事，我又了解更多啦，呵呵，原来我哋嘅为人处世都几相似啊。我亦都见到各人嘅表现，感慨良多，有啲人真係好识扮嘢。不过表伯係最令我哋感动嘅人，佢自己已经係快70岁嘅老人家啦——虽然身体好好，落楼梯仲快过我啊。从上年11月开始，爷爷先后入咗4次医院，表伯基本上每日下午都会去医院陪佢，话怕佢一个人闷，无论我哋点劝表伯都坚持要去。星期五果日，表伯同爷爷讲星期六日要番乡下拜山，约好星期一再去医院，估唔到已经再无机会啦。。。星期日晚，表伯一到广州就赶过嚟，喺爷爷遗像前哭得好伤心。
虽然之前医生同我哋讲係无可能完全好番，都係等日子嘅，但係无想到会咁快，快得令人一时好难接受。唔知爷爷自己估唔估到呢？佢从来无讲过任何悲观消极嘅说话，虽然辛苦但都好坚强，所以亦都无交待任何后事。追悼会上，一切都办得好体面，我喺遗体旁边企咗好耐，觉得爷爷好似训着咗咁。棺木外四周插满火百合，好彩爷爷唔会唔中意姐。呵，到我训喺里面果阵千祈唔好插呢种花就得啦。好多亲人朋友都有参加，告别厅两边挂满花圈，中间企满人，爷爷应该好安慰。
咁多日过去啦，理性上已经接受咗呢个事实，亦都知道自己以后应该点做啦；但係情感上，未免都仲会好难过，怀念总会夹杂住一啲伤感。我始终未能习惯生活中无咗爷爷，呢种改变令我好难受。其实嫲嫲亦都係一样，佢都明白咁样对爷爷嚟讲应该係一种解脱，但毕竟相濡以沫60年啦，突然失去係一件好痛心嘅事。我爷爷好高大威猛嘎，旧社会旧制度将佢哋撮合埋一齐，但佢哋感情从来都好好，互相照顾。爷爷住院咁耐，一直支持嫲嫲嘅一个信念係：等佢好番出院，以后大家就可以继续互相照顾啦。而家爷爷就咁走咗，嫲嫲确实感到好寂寞同无助。有时我会觉得，其实一个人更好，无习惯依赖，就唔会有失去嘅痛苦。可能好多人都会觉得我咁想好傻，呵呵，各人有各人想法姐。
Anyway，我会兑现对爷爷嘅承诺，好好照顾嫲嫲嘅。 08/04/2006 乖啦，训啦其他人喺走廊度复述医生嘅说话同商量一个令我最伤心嘅事情，我已经听过啦，而且听咗会更加揪心，所以行番入病房算啦。喺病床边倾计，倾咗好多无聊事，但我实在无法兴奋，唔再係平常果种嬉戏嘅口吻，而係变得低沉好多。突然，佢讲咗一句：好辛苦啊。。。我嘅眼泪有种决堤嘅感觉，但都係好不容易忍住咗。佢挨得好辛苦，我见到、感受到，我知道嘎，咁点算呢？刹那间，我好想摸住佢嘅头同佢讲：乖啦，训啦。但係我做唔出，我唔舍得啊，真係唔舍得，我咁样係咪好自私呢？我已经唔知应该同上帝祈求咩啦，我唔想为咗自己而难为佢，好矛盾啊。琴晚，我专登设置咗一个振铃模式，夜晚喺宿舍训觉都唔关机。夜深人静，想起佢嘅果句话，我忍唔住啦，就好似而家咁，同时我又好怕手机会响起。 。。。。。。 以上文字係喺4月8日零点左右写嘅，写到果度，daddy手机响起，我哋全家都赶去医院。去到之后，见到嘅已经唔係一个活人，而係一具尸体。。。由于太突然啦，爷爷走嘅时候身边只有几个亲人，我哋都见唔到佢最后一面。无交待任何说话，但总算走得安详。我最恐惧嘅事情发生咗啦，我心如刀割。 一夜无训，只知道不停咁上香——平时我最怕的东西。忙忙碌碌一日，就係唔知道累。忍咗好耐嘅眼泪，终于可以肆无忌惮咁流啦。其实所有安慰人嘅说话我都识讲，亦都係咁同嫲嫲讲，但係每当要我亲口将呢个消息讲出口，我都会讲到一半就突然哽住咗，总係唔可以连贯；就算係写短信，我嘅眼泪都会莫名其妙咁流。所以，唔好逼我讲出口，大家知道就得啦。 满屋、满街都係爷爷嘅影子，都係童年嘅回忆，我喺果度实在坐唔落去啦，我决定逃跑。逃番宿舍，好彩咁啱无人，可以俾我冷静一下。其实我有好多地方好似爷爷，有洁癖、挑剔、贪玩、贪靓、好动，所以我哋惺惺相惜，物以类聚。但係佢竟然话走就走，一啲义气都无。。。 爷爷，您安息啦。。。虽然我好挂住你。。。 |
|
|
