| Jersy's profileJersy说...PhotosBlogLists |  Tools  Help |
|
|
4/23/2008 台风中听Eason唱十年...虽然事隔几日啦，但都係觉得应该讲下。因为上个周末，我去听咗一个场面堪称经典嘅演唱会。
都唔知喺Eason脚头唔好，定係我哋黑仔，每次佢嚟开演唱会都係大雨倾盆。若干年前果次，7月份雷雨季节，大雨过后周围水塘咁；数年后嘅4月，Eason竟然吸引到台风咁早就嚟报到，仲要起个名叫“浣熊”咁鬼cute，将广州城刮到东歪西倒。早早就订好票，想住可以喺交论文后兴奋一把，后来又听讲呢个可能係奥运前广州唯一嘅一场大型演出，更加觉得自己幸运。演出期近，阴天落雨就算啦，仲要刮埋台风...傍晚天河城嘅人潮，相信有一半都係为咗听演唱会嘅——橫风橫雨，鬼有咁多人出嚟逛街shopping，然后将附近食肆都逼爆咩。大家都喺度讨论，“今晚演唱会会唔会取消啊”，“台风又点啊，佢敢唱我就敢听”云云。从天河城行去体育中心果段路，遮都几乎吹烂啊，雨从四面八方咁嚟，有遮都湿身啊。记得3个几月前我係飞奔过去嘅，今次就想行快啲都难，唉。好唔容易入到去，欣然发现我哋果个山顶无敌海景位有顶篷遮雨，严重唔会淋湿啊，望下下面草地，阴功咯，第一次发觉原来山顶位都可以咁有优越感嘎！以为好多人会缩沙唔嚟，但陆陆续续，座位都几乎坐满晒咯，雨仲係咁大，好多人甚至连鞋都除埋。真係未试过台风夜仲咁鬼英勇咁行出街，仲要走去听演唱会，不过几万人一齐喺台风中又跳又唱咁，想下都几过瘾，值得纪念一下。
不过，对于演唱会质量，我想唔止我，在场所有人都应该谈唔上满意。首先音响效果其差，基本上连佢讲嘢我都係半听半估，Eason甚至话佢嘅耳机都一度失灵埋；天雨、地湿、路滑，好多舞台、服装、舞蹈效果又有缩减；最后竟然无encore，狠狠地耍咗我哋一把，匆匆就离去。Anyway，以上可能係天气原因、安全原因，我都可以接受，但我想全场观众最唔妥嘅就係有咁鬼多国语歌！一首又一首，听得大家好郁闷，有啲直头想唔起係乜歌啊；一次又一次，万几人係咁叫“广东话，广东话”，就算Eason听唔到都照叫啊。全晚最经典嘅係，当明年今日嘅音乐响起，大家满心欢喜之际，Eason竟然开口就係国语...有无搞错，咁脍炙人口嘅广东歌竟然都要国语，边个识唱啊...是可忍，孰不可忍，大家开始造反啦，佢有佢喺台上唱十年，我哋有我哋喺台下唱明年今日，台下声势浩大到一度掩盖Eason嘅声音啊，呢个场面真係怪异非常又搞笑非常。都算果个监制有啲良心，将呢个情况feedback俾Eason，呵呵，Eason一番调侃之后重唱明年今日，大家兴奋得玩起人浪，仲全场起身大合唱。
11点都未够就散场啦，都唔知听咗乜就完啦，点讲都係要排除万难先嚟到，但却唔可以尽兴而归，出嚟之后一啲兴奋感觉都无，总有啲愤愤不平，搞到我对Eason演唱会都无乜好印象！下次，可唔可以风和日丽一啲，可唔可以广东歌多啲呢... 4/2/2007 学友好久不见07琴日愚人节，MSN真係同我开咗一个大大嘅玩笑——竟然从凌晨开始，一直都开唔到space！人哋鬼咁兴奋嘅时候，点上都上唔到，不过唔紧要，我今日都仲係几兴奋，哈哈。
3月份，开始或者过程都过得唔係好顺利，亦无乜开心嘅事发生，伤心嘅就有。但係，但係，最后果日，最后果日，实在太开心啦！学友～～
首先，係我坐嘅位置，除咗偏一啲之外非常唔错，离舞台就30米左右（目测）。虽然睇到嘅人都係好细，根本无可能睇到样，但我已经好满足，因为空气好、风景好、音效好、气氛好～成个concert，有经典旧歌，亦有新歌；有佢自己嘅歌，亦有两手人哋嘅歌；有劲歌热舞，亦有舞台剧。就好似一个报告会，将佢过去一两年嘅几张专辑、一个舞台剧、一部电影、一个慈善演唱会全部串起身啦。开始果时旁边果两个男嘅真係好烦，唱旧歌嘅时候，佢哋又话食老本；唱新歌嘅时候，佢哋又话未听过，唔识，唔好听...拿拿拿，呢啲人就係最难服侍嘎啦，简直就係运桔嘅，讲嘢又大声，竟然一边听一边落注赌波，我忍唔住瞪咗佢哋几眼。其实演唱会嘛，当然係有啲新嘢有啲经典嘢嘎啦，咁先可以满足唔同嘅人嘅需要，亦可以有新嘅尝试。对于我嚟讲，唱乜都无所谓，基本上都识嘅。唱功方面，唔使讲，梗係正嘎啦！优点好明显嘅同时，缺点都好明显，毕竟“一把年纪”了嘛，不过完全影响唔到整体水平发挥。至于跳舞...佢亦自知係一个难点，不过佢都做得好好啊，身体好协调，跳得好正常。而果个雪狼湖＋如果·爱mixed小型舞台剧，更加难唔到佢啦，成场雪狼湖都係咁做啦。一个人唱足3个钟，无任何嘉宾，太劲啦，真係辛苦晒！
歌神嘅魅力认真大啊～票晨早就卖晒啦，可能因为係全球（更正：亚洲）巡回第一场，亦係只演一场嘅缘故吧。当晚亦出人意表咁爆满，开场前我哋下面草地嘅已经基本满晒，往后一望，看台上黑压压一片，闪动住荧光棒，无论几等票都座无虚席啊。encore嘅时候学友就话：听讲广州嘅票好快就卖晒我好开心，但呢个都唔係令我最开心嘅，最开心嘅係大家一直坚持到而家都无人走。闻言再往后一望，果然，一样咁多人；我哋前面就更加啦，而且过道莫名其妙咁多咗好多人，阻住晒视线。
其实睇现场，除咗听歌星唱live之外，更重要嘅係气氛咯，仲有台上台下嘅互动。当晚从开头唔知第几首歌开始就万人大合唱啦，欢呼声、尖叫声不绝于耳。点解我影出嚟嘅相咁模糊呢？手震係一个原因，音响效果强劲亦係一个原因，但最重要嘅係我感觉成个地板都喺度震，大家异常high啊。真係唔使专登搞气氛都已经好好气氛啦，不过学友都有讲一啲嘢，分享咗一啲佢嘅经历与体验，感觉好真诚、好真心，仲分别送咗首歌俾两个囡囡、太太、哥哥张国荣。羊羔话：这就是成熟男人的魅力！小猪话：有几次佢换完衫出嚟我觉得佢好靓仔哦！我同意前者，但后者有啲夸张哦...令我怀疑小猪係咩有某啲倾向，或者某啲企图...
480,之前仲觉得心痛，当晚就觉得：绝对值啦！否则我一定会后悔嘎，就好似小猪而家咁。而家叫我俾多480睇多场我都制啊，有啲冲动去佛山添...更加想去香港...我係咪癫咗？？似乎係啦。完场之后，我哋三个人边行边高谈阔论，兴奋到令的士司机都十分好奇。
果晚，我4点训落床，辗转反侧，感觉快5点先训得着，脑里面不停咁“一千个伤心的理由...”“如果这就是爱...”“最回肠荡气之时，可用你的名字...”“摇篮扬帆摇到海角天边...”呃人嘅...
回忆下，都好似发梦咁...如果呢个梦永远都唔会醒就好啦。同大家分享我呢个梦，希望大家都同我一样开心啦～ 6/27/2006 花集众人之花，而家宿舍好似一个花店。我好乖嘎，早晚都有帮佢哋喷水，但係都不敌酷热嘅天气，已经开始有啲枯萎嘅迹象啦。今日出去办事，顺便逛咗逛，竟然买衫都有花送，哈，呢期真係旺花啊！
好多朋友都话想睇我毕业嘅相，其实我都仲收集紧。n部相机，相太多，太乱啦。尚待集齐，尚待整理啊。好嘢係值得期待嘅～
听日开始执嘢，我四年嘅大学生活即将结束啦。好似无太多嘅伤感，只係觉得琐事有啲烦。 6/26/2006 万众期待~今日收到唔少花，两只手都拿唔晒。不过，其实只有一束送啱咗（呢束都係因为特别提醒过），很是郁闷，差啲被呛死了。嗯，不过确实係有啲难度，唔可以怪大家，係我麻烦姐。Anyway，我有花收已经好开心！
daddy本来话要出差嘅，但係今日佢竟然出现咗，仲带嚟咗嫲嫲。我好惊喜，亦都好感动。可能因为我果晚耍性子无理佢一晚，又或者係佢内疚于我以前无论大考小考佢都去鬼咗出差。係咪我太任性呢？好似有啲。不过唔理啦，咁多年先任性一次嘛。由于daddy嘅到嚟，亲友团庞大了一点，又有老人家，所以无咩时间陪专程前来嘅校内校外各位朋友仔，只係匆匆合影，真係有啲遗憾！好彩还有李田招呼大家。在此谢过各位嘅光临，令我感觉好荣幸。想落嚟咗嘅都能有幸遇上，并能合影一张，还算不错！但係晨早就问定话要嚟嘅果条友，竟然为咗去香港shopping就无嚟，运桔。
一早影集体相好晒，但我哋学院真的组织得不错。各班都提前排队，而且现场有不少工作人员，好紧凑，仲比计划提前完成任务，很好，总算无丢管理学院嘅架。之后就係班内同学之间疯狂影，唔同嘅组合，唔同嘅风格。好快就到各位朋友仔同埋家人到嚟嘅时间，又係一轮狂拍。今日真係有啲做明星嘅感觉，企喺度摆住一个pose，就会有唔同嘅人喺你身边不停咁换，然后你只要不停咁笑。而且每次都会有唔只一部相机对住你，好多人轮流叫123，你就望完一部到一部。哇，简直就係明星啊！
今日行程相当紧凑。上午影完相，穿住件Harry Porter袍超热，一身嘅汗。匆匆食咗个午饭，就赶番去参加毕业典礼。无预期中好玩，但就比预期中快，很好。（不得不提，真係好受不了果个EMBA代表嘅发言。）抓紧时间冲个凉，又赶去毕业聚餐。我一般无咩饮酒，所以饮了也不多。飞鸿就係女中豪杰，当然被灌了不少，但顶得住。唔知点讲，但某些事弄得有点不愉快，无奈。聚完餐，又话去唱k，我哋几个去现了一下身就番嚟啦，实在太累！
太耐无穿高争鞋，脚好痛，而且后来行得好啲丑。不过有自备拖鞋，去食午饭时可以轻松一下。另外，好彩坚持唔化妆，否则烈日下狂骠汗，一定融得不堪入目。
Conclusion: 今日一切顺利，非常开心！而且要强烈感谢一下亢亢，最早嚟，又最迟走，并鼎力提供技术以及体力援助，无言感激！ 6/25/2006 听日影相今晚俾一个送花之人通知去收花，一面疑惑。收咗番嚟啦，仲係一头雾水，都唔知係边个送嘅。而家终于知道啦，呵呵，thank you哦！不过。。。我想讲。。。其实我中意嘅花同我唔中意嘅花只有两字之差。。。Anyway，无所谓啦，有心就很好了。
今晚发咗学士服啦，觉得好似Harry Porter袍，果卷道具纸就係magic stick。哈哈，吗哩吗哩哄，变变变～洗咗套衫，晾喺阳台，感觉宿舍就似魔法学院。女生竟然只有飞鸿试打tie，于是几乎全部都集中到飞鸿度先打好，听日拉一拉就得啦。飞鸿真贤淑啊～
呢几晚都有啲失眠，难道太兴奋啦？希望今晚好训啦。万事具备，只欠东风啦～ 6/24/2006 同人影相琴日去参加姚猪、坤少等人嘅毕业影相。
早上嘅时候超多人，学士、硕士、博士及其亲朋戚友，小礼堂前大草坪附近企满晒人。影相果度又略显混乱，企到上台阶先排队，所以进程有啲慢。加上之前落大雨又推迟咗少少。可能为咗迁就院领导及教授们，就先每个院轮流影全院大合照，然后在重新轮过影分系、分班照。哇，咁样每个人嘅等待都係漫长嘅。最终，姚猪上午影完全院照之后，分班照被推迟到下午坤少佢哋之后。
落雨之后阳光好落力，又晒又热，好鬼辛苦。除咗约定嘅人之外，原来仲有好多熟人都係琴日上午或者下午影相嘅。于是我哋基本上都细草坪附近走嚟走去，见到熟人就狂影相，做咗影相机器啊。一日落嚟，全身湿透，好累，而且仲黑咗唔少。
今日我可以匿喺宿舍休息下，但李田同飞鸿仲要出动，可怜。睇我哋院嘅安排，感觉组织得都唔错，应该唔会拖得太耐，希望一切如计划进行啦！望见出面嘅太阳，有啲惊。不过都唔好落雨。 6/13/2006 世界杯！世界波？世界杯开波咯！呢几晚都只係睇咗第一场，一来唔想咁早就捱眼训，二来始终对32强赛欠缺动力。今晚第一场澳大利亚对日本，虽然我无睇，但係都听到前后几栋宿舍嘅欢呼声、尖叫声。一打听，原来日本输波，难怪难怪。而家睇紧捷克对美国，上半场果两个入波都好爽哦，一扫前两晚第一场嘅郁闷，好有冲动继续睇啊。
报告一下，今日一早出发去连州玩，yeah~ 8/26/2005 Snow Wolf Lake 今日做咗一件好开心嘅事，就係拿咗只雪狼湖碟俾教父！有志同道合嘅人感觉真係好！中意嘅事情做几多都会好乐意、好开心，而且仲会好主动咁去做。当然，我一直都认为帮到人真係一件好开心嘅事情，要咁样人先会无白活；如果同时能够做到自己中意嘅事情，就更加好啦。
今年我去过两次天河体育中心，第一次係雪狼湖，无得倾，正！虽然係普通话，但係第一次听张学友唱live，已经完全感受到佢歌声嘅魅力！从小就中意佢，就係觉得佢唱歌好好听。同学朋友都係中意靓仔，我就只管歌好听。大家中意黎明嘅时候，我中意张学友；大家中意谢霆锋嘅时候，我都係中意张学友；到而家，大家中意twins嘅时候，我都仲係中意张学友。佢哋成日都笑我无taste，我唔介意，唱歌姐，使咩一定要靓仔，靓仔有梁朝伟、吴彦祖，大把啦。近排先有人问我中意听边个嘅歌，我梗係话友仔嘎啦，然后补充句Eason都唔错，佢话我咁老。其实我当时心想：难道中意twins咩，唱live一塌糊涂！讲番雪狼湖，97年果时仲係读紧初中，无钱只好买翻版。果只碟我听咗都唔知几多次，超正！佩服张学友之余，好佩服啲作曲填词嘅，三十首歌串出一个动人嘅故事，我听完两张碟已经大概想到呢个舞台剧嘅剧情係点啦。好多年无听，今次竟然有机会去现场听concert，好似发梦咁！旧曲新词，虽不及原版，但都别有一番风味啦。第一次听concert，就係自己最中意嘅，令我好兴奋啊！而家有少少钱啦，当然买咗只正版支持下学友啦！
第二次就係上个月去听Eason，万人karaoke，气氛超正！我发觉，原来Eason唱live同样係超好嘎！有时甚至比CD嘅仲好，可能係演绎方式唔同啦。当晚听到好多熟悉嘅歌，我哋几个都有跟住唱；又有一啲唔识嘅歌，特别係普通话嘅。第一次喺个场度大叫encore，好过瘾嘎！真係好想去下HK嘅演唱会，听讲气氛会好好多。
有时真係觉得而家香港嘅乐坛好k型，只要样靓，包装好，歌唱得几差都同样可以上台，可以拿奖。亦完全揾唔出一两个领军人或者代表性人物。过去，60、70年代有徐小凤、许冠杰，80年代有张国荣、谭咏麟、梅艳芳，90年代就四大天王、王菲，每一个都係乐坛大哥、大姐，有绝对嘅号召力，足可以代表一个年代！到21世纪啦，又如何呢？满天繁星，但係无一粒係真正璀璨嘅！好彩都仲有Eason、克勤、古巨基呢啲撑一下。而家我都有听好多新人嘅歌，打发下时间咁咯，要求唔高，顺耳就好，兼且可以学番几首唱k果时唱下，费事人哋话我out啦。 |
|
|
