| Profil de JersyJersy说...PhotosBlogListes |  Outils  Aide |
|
|
28/05/2007 孤寡老人康复了报告一下先，喺几位热心社工嘅照顾与帮助，以及众多热心人士嘅关心下，兴兴老人家已经逐渐康复啦。听讲今日去复诊医生话无乜事啦，只需食药巩固，不过以后感冒都要小心，因为好容易复发，似乎有啲手尾长哦...所以话，有病就要及早就医。
周末，发发嚟咗广州哦～当然，主要係约会女朋友，其次係探望病人，最后先係顺便接见下我哋。哈哈，讲笑姐。于是，永发就可以提前聚会一下啦，例牌节目：食饭、吹水、饮嘢、打牌。病人好烦，乜都唔食得，后来决定忽略佢，等佢食青菜算啦。可惜，我哋伟大嘅LT老师因路途遥远无法出席，有意揾家属syy做代表，点知惨遭拒绝...食饭期间致电L老师，想住嚟个电话聚，点知发发无讲两句，喺电话果头极度兴奋嘅L老师话有个学生生日，佢哋正为佢庆祝，叫我哋一齐喺电话度祝佢生日快乐...全场同志都异常汗...学生？唔识嘎啵，点祝啊？L老师不顾我哋嘅坚决反对，依然不断咁叫我哋准备好...大家都有啲伤心与不解。L老师对佢嘅学生真係好好哦，希望分别嘅时候佢哋都可以冷静啲啦，仲剩番一个多月而已... 23/05/2007 钟点工今日我同FH去做咗一日钟点工，煮饭、执屋无作不能，但可惜无工资嘅。一切皆因兴兴病咗，而且病得唔轻哦。
星期日，syy叫埋我同FH去睇佢，但当时我有事，同佢通过电话之后觉得佢都几正常，以为佢只係普通感冒发烧，所以就无去啦。听FH讲，果晚佢哋去到，按咗好耐门铃，兴兴先无精打采咁嚟开门，身上裹住n件衫。入边乌灯黑火，中午净係食咗两只生番茄，水又饮晒未叫...俨然一个独居无人照顾嘅孤寡老人咁。安顿病人、叫水、煮粥...佢哋两个做尽社工会做嘅嘢。兴兴病情比较反复，白天好转，晚上又会高烧，于是第二朝FH就抓佢去睇医生。唔睇唔知，一睇就吓一跳。照肺拍片，化验单啲专业术语吓死人。反正简单讲就係肺炎，所以会持续高烧。无计啦，吊针食药肯定就走唔甩嘎啦。
我觉得佢哋公司真係认真无人情味，员工都病成咁，都唔俾佢请假休息，点都要佢返去做嘢，理由係除咗佢无人识做果份嘢...我觉得佢哋嘅业务设置及分工好唔合理啊！佢啲同事仲过分，就住隔离左右、楼上楼下，佢病咗咁耐咁严重就净係嚟慰问过几句，讲句唔好听，有乜事揾个叫白车嘅人都无啊。天啊，难道无情係中国银行嘅企业文化？！成间公司都係咁嘅？！之前几日佢就上午去吊针，下午返工做果样只有佢识做嘅嘢，晚上七八点先放工。由于我哋上午都要上课，所以呢几日都见佢唔到，只能用电话遥控，退烧未、食饭、食药、早啲休息..佢一直无退烧，晚上仲会特别厉害，所以由前晚开始就派syy去陪睡。琴日佢生日，佢果班同事拿咗个蛋糕去佢屋企，兴兴净係负责吹蜡烛，之后就只有睇嘅份啦...明知人哋病咗唔食得，都唔知拿景定赠庆。
今日上午，我同FH一齐去医院探望正在吊针嘅兴兴，之后佢又要返工啦，阴功。而我哋两个就开始钟点工嘅工作啦。首先去市场买菜，狼狈及无知状就不值一提啦。然后就破门而入，里面嘅情形就一个字：乱。独居男老人嘅屋就唔期望太整洁，仲要病埋，咁就更加啦。厨房就交俾FH煮饭——当然係我哋两个自己中午果餐啦，我就执屋咯，只可以讲执到基本见得人啦。我哋喺果度叹咗一餐劲嘅，再煲好一锅粥先离开。
呢个故事教训大家，出嚟做嘢真係好惨，一日未死都要做；所以工作最好唔好离家太远，或者就同熟悉嘅人合住有个照应，否则搞到自己成个孤寡老人咁好可怜的。不得不提嘅係，FH真係非常贤淑啊，入得厨房出得厅堂，煮菜仲好好味嘎，以后嘅某人真幸福啊～ 08/12/2005 同学录，过瘾！ 琴晚无聊，想起应承咗李田嘅事，就去揾果本封存咗好耐嘅初中同学录。由于搬过屋，啲嘢执得比较整齐，好快就揾到啦。呵呵，原来以前喺大家心目中嘅我係咁嘎喔。我读书有咁勤力咩？有咁恶咩？有咁cool咩？张老师同陈老师有讲过果两句说话咩，点解咁多人都提到，而我就无咩印象？喺同学录里面溜低笔记嘅人唔多，但真係各有各特色、各有各风格，一边睇一边觉得好好笑，亦都令我重新认识自己，起码係初中果时嘅自己。讲真，里面讲到嘅好多嘢係我而家嘅同学、朋友无法想象嘅，甚至连我自己都觉得有啲印象模糊，好有意义。
李田成日话而家嘅我同初中甚至高中佢所认知（认知唔同认识，也许係佢当时唔了解我）到嘅我好唔同，我半信半疑。睇过同学录之后，觉得自己的确係有啲改变嘅，不过同李田讲嘅係两回事。李田所讲嘅方面，其实我一直都係咁，只係佢当时同我唔熟，而家佢就越嚟越了解我姐。我好怪嘅，我唔会主动同陌生人或者唔熟嘅人讲好多嘢，除非我果日心情超靓或者我觉得有必要同佢打交道。如果只有两个人嘅话，我都会制造下话题以免冷场嘅。而同熟悉嘅人，我就会噼哩叭啦讲个唔停，仲越讲越兴奋。所以唔熟嘅人会觉得我cool，熟嘅人会觉得我傻。而我觉得有改变嘅係喺同学录里面讲到嘅某些方面，亦即係之前讲到嘅而家嘅同学无法想象嘅，甚至连我自己都觉得印象模糊嘅方面啦。哈哈，成功！
有啲后悔高中无写同学录，否则又可以对比一番啦。大学有机会嘅话真係要写下，以作留念嘛！
玩咗一阵，又要开始温习咯。。。 24/08/2005 八班聚会 啱啱上传好21号晚八班聚会嘅相，只觉得一片混乱。八班嘅人好似都比较猖狂，玩得比较癫。记得聚会果晚有两围台，一围全部男生，一围大部分女生四个男生。点嘅菜同五班聚果日差唔多，而且全男果围有一半都係五班聚会果日都有份，都係左埋一围嘅，但係情况就完全唔同啦！八班聚果晚，可能啲菜上得比较慢，啲男生好似恶鬼咁，每上一碟菜，喺几秒钟之内都会一扫而空。佢哋会同时起筷，好似抢咁扫荡只碟，配合埋佢哋嘅叫声，场面极其恐怖，但又真係好搞笑！可能大家又觉得一班人起哄好玩啦。每次上菜嘅时候，如果只有一碟先来，我哋都会叫服务员上佢哋果围先。服务员姐姐见到佢哋个狼胎样，喺吓咗一惊之余都不禁偷笑。我哋围果几个男生都庆幸无坐喺果围，起码有啖好食。后来我哋女生无咩人食果碟葱油饼，一大半都拿去救济果班“灾民”啦。最后，7点开席，8点就上果盘啦，比五班果日足足早咗1个钟。其实有大部分都相同嘅人，点解食起身会有咁大差别呢？五班聚果时又会斯文咁多。可能风格唔一样，五班嘅係会边食边倾计，好淡定；而八班嘅就会先一窝蜂抢完，然后霸住间房一直吹水。结果，同五班一样，都係9点半左右离开，我同样坐唔到247，要去挤125！
我喺呢次聚会上获得嘅一个最令我震惊嘅消息喺有一个去咗法国嘅同学两个月前已经注册结婚咯！我真係无想到我嘅中学同学咁早就结婚，佢应该係我哋班最早嘅一个咯，不过真係恭喜佢，遥远咁祝佢幸福！希望佢会收到啦。
唉，一个月内去咗明记聚会三次啊！从爱琴海到地中海再到黄海，明记嘅招牌菜我都食咗三次，都到好闷啊！八班果晚我最常讲嘅一句话係：又係呢个送啊？！哈哈，喺呢度实习都几好，可以一边工作一边及时上传各次聚会嘅相，又可以有时间写下日记。工作都算充实啊！ 18/08/2005 五班聚会 琴日，高中五班同学聚会，好热闹哦！坐咗两围台，仲坐得好逼添。艳妹妹都有来，令我既意外又兴奋！大家讲起暑假的活动，都不外乎几样：实习、学车、新东方、温习考研。
我发觉原来有唔少人都打算出去读书，有去香港嘅，有去国外嘅，所以暑假都忙于上课、温书，准备考IELTS/TOFEL。曾经有人问过我有无想过出国读书，讲真，我似乎从来都无咁嘅打算。我唔係特别中意读书，热衷研究嘅人；又唔係追求干一番大事业嘅人；亦唔係好向往国外生活嘅，所以我觉得留喺国内，同亲人朋友一齐，开开心心就好。我有一个同学，佢读嘅係计算机，佢好想去芬兰深造——好多人都会想去美国、英国、澳洲之类，佢係我第一个听讲想去芬兰嘅——佢话佢中意呢个国家，而且果度计算机专业唔错。我好佩服佢，觉得佢係真正为咗理想而出国，希望佢可以成功啦！出国嘅就会去上新东方或者终日喺图书馆度温习备考，而考研嘅亦都会留喺学校宿舍度闭关。有人说：保研的过着猪一样的生活，找工作的过着狗一样的生活，而考研的就过着猪狗不如的生活。考研嘅人定力同恒心都唔可以缺少，要耐得住寂寞，忍得住痛苦。我就自问无咁嘅本事啦，所以我选择做小狗狗算啦，希望能够揾到个好人家啦！
琴晚整理聚会相片嘅时候，打开咗旧年差唔多时候嘅聚会相睇咗一下，发觉旧年比今年多好多人啊，坐咗四围台！就讲老师，伯成同冬霞姨都有。仲有Judz、猪昉、思祺，而咁啱佢哋而家都去晒大洋彼岸嘅U.S.啦。而脚毛就两次都无份参加。本来今次番嚟都有机会嘅，无计啦，佢走之前组织者仲喺内蒙古搞紧牛奶。不过都好，上个月有旧三班聚会，虽然只有一围台，但係我觉得都算唔错啦。我都见番好多好耐无见嘅人，仲有一个人我竟然唔记得咗佢，见到佢嘅时候根本想唔起佢係边个，要问旁边嘅人，好淤啊。。。其实我而家都仲未分清三班同五班嘅人！
而最开心嘅係有人话我减肥成功啊！佢话我大一果时肥咗，而家就瘦番啦。其实我都觉得一入大学好食好住，肥咗好多嘎，所以一直都好注意。呢排虽然一日三餐都食齐，而且好丰盛，但係每日只係训6个钟都唔够，仲成日对住部电脑，而家坐车都可以训到只猪咁啊。琴晚番到屋企其实已经好累好累啦，但係又想快啲整啲相出嚟俾大家睇，所以又搞到12点几，今日成个人好似就快散咁，仲好眼训啊。。。 |
|
|
