| Jersy's profileJersy说...PhotosBlogLists |  Tools  Help |
|
|
2/1/2009 恭喜发财！！！点解假期总係过得咁快！你话日日都放假几好呢！
琴日又有得饮，呢个月第三单啦，又係只请两老，无我份，我要食自己。自己食乜好呢？打开冰箱，见到有年糕，突发奇想：炒年糕？但中式年糕应该唔可以炒吧？食咗会唔会肚痛？算啦，煮面+通粉。哇，好大一碗~卖相唔似会食死人嘅，食咗第一啖，可能只有我自己有勇气坚持不懈咁食落去...面太软，通粉太生，汤太淡，蛋...幸亏没有蛋壳...好啦，反正就食饱咗。
呢个假期除咗有利是抖之外，查实都好清闲，天气又冻，所以成日坐喺度发呆，有日突然想明白咗一啲嘢，一直想唔通嘅事情终于揾到症结所在啦！但係喜忧参半：知道咗点解，却唔知道点解决。好矛盾，解决唔到，要继续思考...
今日见翻两张以前嘅小信件，好过瘾，原来十年前我哋嘅交流係如斯有趣，十年前嘅我亦係如斯有趣。信中所讲嘅事情已经印象模糊啦，有趣嘅係大家对于呢件事嘅处理手法，实在太坦诚啦，敬礼！人家仲赞我宽容添啊！但家阵我感觉自己变得越嚟越隐晦，越嚟越小气啦！想得越多，想说嘅却越少！以前唔满意一个人，可能会直接同佢讲，大家讲翻开就无乜嘢啦；而家就直接唔想同佢讲嘢，然后冠冕堂皇咁话：道不同不相为谋。反省，反省！ 10/5/2007 勇斗病毒，奋战开题今年中秋同国庆长假咁近，又无乜课，好多人都会提前闪走，放自己一个长达20日嘅大大假。呵呵，有时寒假也不外如是。
放假前两日收到一个噩耗：放假后交开题报告初稿...其实都唔算太噩啦，之前都预料到并打算着。放假前一日发现一个更大嘅噩耗：宿舍台电脑出问题了...还好，已经打包好回家写开题。放假后“养精畜锐”咗一日，第二日，惊然发现一个更更大嘅噩耗：宿舍嘅电脑唔係坏咗，係中毒了...由于我嘅无知，拿住个u盘周围插，令到屋企全部电脑都中毒了！有如晴天霹雳啊...
呢个病毒就係所谓嘅AV终结者，其变态之处就唔详述啦。喺众多热心人士及一位自称高手嘅远程帮助同探索下，先用一台电脑作试验，不断咁重装杀毒再重装再杀毒...发觉自己真係唔係一般嘅黑仔，各种奇怪嘅问题层出不穷。努力咗两日，迷雾终于逐渐散去，慢慢摸索出一条救国救民嘅道路啦！技术活过后，剩番嘅就係体力活。救治埋另一台电脑，再装番所有应用程度。真係电脑生病我受罪啊...当时果种困惑与彷徨係最令人郁闷嘅。
好啦好啦，终于有电脑用啦，剩番三日，闭关开题啦！至于宿舍果台宝贝...放假后再处理啦。 9/23/2007 大学城半日癫今日嘅疯狂係从下午三点开始...首先係疯狂咁塞车,成条广州大道南好似食咗几担猪油咁,连带住我就疯狂咁迟到... 好唔容易去到大学城,小龙gg同佢嘅绵羊仔已经喺站外等候啦.哇,睇嚟小龙gg对老师一职已经驾轻就熟啦,由内而外都好有为人师表嘅风范.LT一副prettywoman~walking down the street~嘅装扮,踩住高踭鞋,短裙飘飘,但竟然沙胆到要无牌驾驶绵羊仔!虽然果度人车都少姐,但我哋依然好担心,无人咁坐...行咗数百米后,佢就自觉无瘾落翻嚟啦. 好,到戏玉啦.以最快嘅速度将所有食物塞晒落口之后,睇下表:弊,又要迟到啦!与LT匆匆赶到华师校区,乌灯黑火...体育馆在何方啊...好唔容易揾到个路人,打听到大概方位.呢度真係唔係一般嘅荒凉,我哋亦唔係一般嘅猪...盲盅盅,绕住教学楼图书馆兜咗个大圈,行咗好长一段冤枉路先回归到正途...行咗好耐好耐,见到好多似是而非嘅建筑...结果迟到大半个钟,好彩比赛仲未开始.算啦,就当夜游华师,免去听果啲烦闷嘅领导发言. 去大学城玩咗半日,已经足够累啦,训啦... 8/18/2007 大地震鉴于FH同学嘅传播能力比较强，相信好多人都知道啦，前几日我哋宿舍发生咗“大地震”啊！甚至波及到隔咗n间嘅宿舍。在此我就唔详述啦，唔知而又有兴趣嘅可以访问FH嘅space。
我而家就身处灾难现场！由于恼火中烧嘅FH回家散心了，HZ又去咗图书馆赶paper，只有HZ妈妈留守，所以我暂时见唔到硝烟，亦闻唔到火药味。
感觉FH真係好嬲，之前言谈中多次出现“报复”字眼，搞到大家都觉得好严重，纷纷走嚟问我“你哋宿舍係咪搞得好大锅”。其实，我认为，呢件事的确唔係小事，因为FH作了牺牲，又照顾咗佢哋一家人唔少，但到头来却咁样俾人冤枉，佢哋态度仲咁唔好，FH的确几委屈，所以佢咁嬲都可以理解，并且我都係企喺佢果边嘅。但係，嬲还嬲，无需要搞到咁大阵仗。相处咗成年啦，大家都清楚HZ嘅性格为人，喺佢心里面，佢就係一个公主，只有你就佢，否则就只有吵。咁大家室友，无谓将关系搞到咁僵，所以我同CC一般都係以迁就为主，而FH就会不时同佢擦出啲小火花，只係今次嘅火花就大咗啲。既然当初决定咗要做好人，凡事能忍则忍，向积极嘅方面想，唔好埋怨太多；实在忍唔到爆发一下咯，我哋都会支持你。但千祈唔好将佢上升到国仇家恨、阶级斗争咁，咁样只会嬲亲自己，而且件事确实无咁严重嘛，何必将佢搞大。
要对自己讨厌嘅人微笑～慢慢地，你就会觉得呢个人其实无咁讨厌。呢个係我喺初中就开始学识嘅道理，我觉得咁样做人会开心啲咯。
我每次翻宿舍都只见到HZ妈妈，佢每次对我都好客气，第一次果阵仲好郑重咁向我解释借床训嘅事情，感觉佢份人都ok啊。而且佢真係好勤劳，将宿舍搞得非常整齐干净，仲不辞劳苦咁帮HZ收拾。
凡事睇开啲，自己都会开心啲。虽然灾情唔算严重，但灾后重建工作都係巨大而艰辛嘅！而且需要所有成员之间嘅谅解与帮助，加油吧！ 8/13/2007 聚会前中后传琴日癫咗一日，上午去拣靓相，午饭F班，下午办事、送小钰车、吹水，晚饭就E班，宵夜拉大队食凉粉。唔係我哋故意贪方便，次次都将两个班嘅聚会安排喺一日，而係大家嘅schedule实在太忙，呢个啱啱翻，果个又话过几日走，咁就只有呢个周末咯。 之前发咗一轮牢骚，其实都无乜嘢嘅，只係觉得有啲人比较唔负责任，发短信又唔复；有啲人更过分，话咗嚟又无声无色咁玩人间蒸发。人多有人多聚，人少有人少聚，我哋只係唔妥啲人咁嘅态度。不过之前点激气都好，当日都好开心，攰都抵啦。 一人有一个梦想，呢几日听到好多人嘅梦想，仲有一种士别三日刮目相看嘅感觉。其实读书多或者成绩好又点啊，可能佢哋根本就唔知自己想做乜，一切就听从命运嘅安排，喺顺境中随遇而安。往往有啲唔起眼嘅人，佢哋机会唔多，选择唔多，心中却有一个大大嘅梦想，凭自己嘅努力争取每一个机会，一步一步咁向住自己嘅目标进发。我一直都认为自己身边从来唔缺前一种人，但家阵顿然发觉，后一种人异军突起！佢哋嘅梦想遥远得嚟又好实在，唔知点解我都觉得好开心啊！大梦想我就无啦，小梦想我都有嘅——呵呵，我都唔係啲咩志存高远嘅人啦。 嗯，想起一首歌： 8/10/2007 热情被冷水浇灭！呢几日为咗组织聚会嘅事我可谓火大啊！ E班果边由于各主创人员尚未到广州，咁就暂且由我负责落实。虽然定时间地点呢啲嘢好烦，不过通过电话连线同大家有商有量，定好之后就广发英雄帖啦。xdjm们都好积极，回复得好快并且出席率好高，一下子就凑齐两围台，而家仲惊紧人太多挤都挤唔落添。 反观F班果边，我只係协助小钰，一切工作都係同E班同步进行嘅。但都唔知点解，啲人都唔复短信嘅！嚟或者唔嚟，又或者暂时未定到，总有个答案吧。你唔复，我哋就认为你可能收唔到，就要想其他办法揾你嘎啦，搞到我哋氹氹转。呢个係态度问题，一啲礼貌都无！恶劣！再加上好多梗脚唔係去咗外地就去咗外国，而家先勉强约到20个人，有啲人仲好似要我哋求佢去咁。 心淡啦～我同小钰都讲紧，今次係最后一次啦，下次都咪搞啦。我想，係咪我哋太过积极？太一厢情愿呢？其实大家对聚会都无乜兴趣啦？或者係啦。其实我哋只係觉得大家咁耐无见啦，趁比较齐人就出嚟吹下水咯，了解下近况，无他嘎。我哋亦都唔介意主动组织一下，最紧要大家开心嘛。但如果大家将呢个视为一种负担，无乜兴趣，咁就当我哋自作多情咯。以后我哋识做嘎啦，费事自讨没趣。 而家永发又係咁。每次都係我发起，然后总会收到一啲唔积极嘅反馈，搞到我好似好花痴、好白痴、好得闲、好不甘寂寞咁！好啦，得啦，我唔理啦，仲有大把嘢等住我做啊！ 7/27/2007 猪移民了，猪肉当然贵啦终于见到传说中嘅艺术家猪昉啦，原来我哋都有两年无见啦，上年暑假就缘差四日。最搞笑嘅係小钰发俾佢嘅果条短信：我哋8.13聚会，你一路顺风啦...小钰真够幽默哈！猪昉头发长咗又健硕咗（佢强烈要求要用呢个词），睇嚟果边好食好住喔。用佢自己嘅话讲，一年前係油画派，而家係国画派。我见过佢之前嘅相，佢概括得好有道里，就係咁嘅feel啦，反正就係艺术家咁咯。
之前就听讲过猪昉同女友好痴缠，今日一见，所言非虚。佢先顾住同周公倾计迟到大半个钟，好彩我都不甘示弱迟到半个钟；等咗好一阵，佢讲住电话入嚟，一听就知係女朋友，坐低后旁若无人咁一直鸡啄唔断，我将本餐牌由前到后、由后到前翻咗n次，细看每一段文字及每一张图片，佢仲要表明自己係重色轻友嘅，真想拿起个杯就den过去。讲完之后佢仲要唔挂电话——哇，监听啊？搞到我极度恐怖，开始果时唔敢乱讲嘢，后来唔知几时挂了。不过之后都讲咗好多搞笑嘢，佢依然仲係咁八。猪昉始终係猪昉，外表虽有所改变，但本质似乎无乜点变，依然咁傻咁搞笑。
佢係近两个月嚟我见过嘅第四位从US翻嚟嘅人啦。其实原本仲有一位嘎，唉，都唔知係我失败定係佢失败，不提也罢。有嘅事业（学业）有成，有嘅爱情得意，反正四个人四种生活，轨迹完全唔同，但都各自各精彩。当然，精彩嘅背后不免会有大大小小嘅烦恼，我又何尝唔係呢，但只要有一样嘢係可以令自己觉得骄傲同幸福嘅，咁就已经足够啦。
顺便讲一下，我去睇咗男儿本色。总体嚟讲唔错，就係有啲夸张，令人感觉成部灾难片咁，鬼咁血腥；有时又以为自己睇紧蜘蛛侠，啲人可以满天飞；有时又好似喜剧咁，成间戏院嘅人笑翻天。不过，吴京好型哦，佢早该拍呢种动作片啦；谢霆锋好惨，又撞又跌又打，好痛哦；余文乐好好笑，要屙子弹；房祖名就最傻仔啦，有时啲表情好鬼似成龙，但动作就一啲都唔似啦，不过最后受吴京果几脚就真係几深刻。值得睇嘅，特别係啲动作场面，嚟真嘎。而且唔使太用脑，用得多反而会太早估到结局同发觉有啲剧情唔合逻辑，所以靠脊柱反应就够啦。 7/22/2007 终于安静了space又喺我毫无心理准备之下换咗个版面，不过都几靓几方便，我都係时候换下个背景啦。
从凌晨开始，就为两个人嘅争论斡旋、调解，一个就意气用事，一个就麻麻烦烦，好彩佢哋唔係情侣，亦都应该无可能成为情侣，否则真係有排搞。本来学术呢家嘢嘛，啱就啱，错就错嘎啦，无需要动气。但由于当事一方俾另一方激亲，相当唔冷静，所以搞到我好似哄细路咁，晓之以理，动之以情，口水都干埋。不过有个经验可以总结一下，就係调解前一定要听匀双方陈词，如果只听片面之词嘅话好容易会造成偏颇。我想，两个都唔係记仇嘅人，都係大情大性之人，过后就无事嘎啦。
咁快就到7月底咯，手上嘅事仲有一堆。最后一个暑假啦，真係好想去下旅行，琴晚同教父倾开，搞到我心思思想去欧洲，不过想下好啦。我要安慰自己，去过西藏啦，仲想点，其他嘅以后再实现啦。而家做嘅事都好有意义嘎，起码可以帮我喺简历上多加一两项。嗯，就咁啦，要义学业为重！
原来病真係可以好无拉拉嘎，点避都避唔到。无计，就当新陈代谢啦。 5/10/2007 梦游西藏琴日记流水帐被批评了，今日要好好写一写。但最近精神状态不佳，可能仍然会有啲语无伦次，大家多多包涵哈。至于点解会精神状态不佳，稍后就会有说明嘎啦。今次就分topic嚟讲啦，如果有乜话题大家关心而我又无提到嘅话，尽管提示一下，我会尽量满足，哈哈。
关于高原反应
呢个似乎係大家最关心嘅问题啦。只要听讲我去了西藏，99.9999999%嘅人第一反应都係问我有无高原反应。我嘅答案係：有；而且补充一句，有反应係非常正常嘅，无嘅係牛人。其实喺林芝果阵係无乜反应嘅——毕竟只有2000几米，我哋一直贯彻讲话要慢、行动要慢、休息要多嘅原则，身体状况一直唔错。如果一定话有乜特别嘅话，就係有时会感觉到心脏嘅跳动明显加快，呼吸有啲唔自然，训觉嘅时候能够清楚听到自己嘅心跳，有啲阻碍入睡。离开林芝前一晚，蔡校长俾咗一个氧气罐同一大盒红景天口服液我以备不时之需，令我好是感动。经过几个小时嘅颠簸，去到拉萨觉得有啲累，初次见到布达拉宫也不怎么兴奋，但总体都无乜事，依然坚持慢动作行事。可能当晚训唔好，身体又有啲抱恙，再加上奔波劳碌咁前去近5000米高嘅纳木措，咁就令我嘅高原反应喺果日达到了顶峰！晕咗成日，特别係回程果阵，心口痛（简称心痛）、后脑勺痛、呼吸困难、鼻塞流涕...真係大力呼吸都会心痛果种啊，训觉果阵心简直好似想从喉咙跳出嚟啊。点样应付高原反应呢？其实唔使紧张嘅，去之前按要求食啲红景天预防，感觉唔舒服果阵再食，一切行动都要慢，初到嘅时候唔好活动太多，唔舒服就训觉，训到自然醒，就算训唔着都要执着地训，再唔得就去吸氧。好多人话高原反应好多时候係心理作用，我觉得都有啲道理嘅。有人高原反应会导致训唔着，而我就只觉得心跳声好吵，咁我就安静咁数一下心跳，好快就训到死猪咁啦。熬过果日，之后就乜事都无啦，正常咁活动。有高原反应，相对应地，应该就会有平原反应啦。高原反应係因缺氧引起嘅，相对地，平原反应就係因氧相对过量引起嘎啦，俗称醉氧。我而家就係处于呢种状态啦，无时无刻都觉得好眼训，特别係第一日，点训都训唔够，成个人好似生活喺梦幻中，所以讲话都变得有啲语无伦次。据说肥HK寒假时醉咗一个星期，按照比例，我都差唔多醉完了挂。无论係高原反应定平原反应，都係滞后嘅。你刚到嘅时候似乎乜事都无，亦唔会明显觉得缺氧或多氧，要到第二日先会慢慢体现出嚟，所以唔好以为无事就轻举妄动。
感冒
一直听讲喺西藏感冒係一件非常恐怖嘅事情，好容易引起肺水肿，会死人嘅！其实正确嘅说法係，唔可以带着感冒进藏，咁样会好危险。但如果係进藏后，身体喺某个程度上适应了，再感冒嘅话就唔使太担心，及时护理就可以啦。其实我都唔知我算唔算感冒了，喺林芝开始我嘅鼻就唔舒服，包云吞一直无停过，甚至而家都未好啊。去纳木措果日，仲一度有啲低热，唔知係咪心理作用。听TT佢哋讲，喺西藏感冒了，严重者要住成个月医院番唔到嚟，于是我一直好乖咁配合李医生嘅“治疗”，至今一切还好。另外，进藏后一个星期内最好唔好冲凉，一嚟怕冻亲感冒，二嚟怕加速血液循环加剧高原反应。但我哋广东人边受得了呢种折磨，我进藏后第二日就忍唔住冲凉啦，不过係喺短短两分钟内快速解决的。之后隔三日又冲咗一次快速凉，然后翻到广州再从头到脚彻底洗刷咗一遍。所以，喺西藏一定要注意保暖同休息，尽量唔好感冒；实在受唔住要冲凉嘅话，最紧要快。
气压&日照
去到西藏，唔只人会有高原反应哦。我哋从广州带去嘅饼干同糖，全部都变得鼓鼓的、胀胀的，好似充咗气咁，好有趣。我嘅护肤品更夸张，一开盖就直接喷出嚟，而且每到一个更高嘅地方就喷一次，非常浪费啊。我哋成日笑说：它们的高原反应比我们还严重啊！翻到广州之后，我嘅塑料水瓶扁了，护肤品樽亦都全部扁了，甚至带番嚟嘅嘢食都变咗抽真空包装啦。今次亦都彻底体会了咩叫做80度沸腾。眼见住果个火锅，煮咗好耐都唔滚，水滚咗入边啲肉又好耐都唔熟，自己煲嘅水亦都不足100度的。至于日照，肯定係猛烈无比啦，太阳时时刻刻都毫无保留咁亲吻着你，搞到我成日都涂一层又一层防晒、戴帽、墨镜同口罩，将自己全副武装起嚟。因为係着长袖衫嘅，所以而家手同手臂係好明显两种颜色。日照除咗伤皮肤，仲伤头发，唉。不过果度嘅空气尚算不受污染，出汗也少，头发几日唔洗都无广州咁难受。西藏嘅日照时间好长，晚上9点先天黑，所以一般8点先食晚饭，1点食中午饭。我爸妈成日8点几打电话嚟我仲以为好早，其实广州早就天黑啦。早上我最早试过6:30起床，已经天光啦，唔知佢係几时光嘅。係啦，西藏晚上嘅星星好多好靓，仰头观望，就如置身银河般。
天气
我哋喺果边嘅日子，普遍都係阳光普照嘅，蓝天白云非常养眼，偶尔会有啲阴天。果边昼夜温差比较大，早晚比较凉，中午暴晒时可以达到20几度。对于我哋呢度初来乍到嘅人嚟讲，最好都係着多啲衫，所以我一直都着毛衣加厚外套仲要两条裤；而对于LT同佳佳呢啲久居高原嘅人嚟讲，随便两件衫就ok啦。地理都学过，越高嘅地方会越冻，所以上纳木措果阵我着咗两件毛衣加羽绒，将所有冻天衫都着晒上身啦。但係唔知点解，日喀则虽然比拉萨高，但係就平均都比较热，睇嚟“日光城”都唔係浪得虚名嘅。西藏嘅另外一个特点就係异常干燥，我半支润唇膏係短短10日内就用晒啦，鼻里面每日都出血，而我呢种一日到黑包云吞嘅人鼻前面更係干到都掉皮啦，手亦都干到好恐怖。都係广州好，番嚟之后滋润多了。干燥仲会使静电异常普遍，我差唔多每日关车门嘅时候都会触电，搞到而家有啲车门恐惧。
食物
果度最多嘅就係川菜餐馆，可能四川人比较多吧，有人话：西藏的普通话就是四川话，此话不假。另外仲有啲新疆大盘鸡、山东煎饼、云南过桥米线...虽然我每餐都强调唔要辣，但係辣总係无可避免嘅，严重崩溃。当然，主流就梗係藏餐，同埋好有特色嘅藏式茶馆，可惜后者我仲未嚟得切去。托LT嘅福，我哋有幸食到藏民屋企嘅藏鸡蛋、酥油茶、白面饼同好硬嘅果啲唔知乜牛奶扎。如果问藏鸡同普通鸡有乜区别，我就觉得佢比较白，生得英俊啲，听讲仲识飞，而藏鸡蛋亦比较白比较细只，而且好香好嫩。周书记仲请我哋食咗一餐好唔错嘅正宗藏餐，糌粑、涮牦牛肉、烤羊排、无花果伴酸奶...糌粑要和鲜牛肉末（生嘅）食，肉类都有好重嘅调料、香料，酸奶真係比较酸，总体味道还可以，但总有啲食唔惯，有啲骚骚的。饮嘅就比较丰富啦，酥油茶、青稞酒、拉萨啤酒，仲有红景天饮料。其实酥油茶就係咸嘅有啲骚嘅奶茶，青稞酒嘅味道有啲似啤酒，大概四五度左右。
宗教
呢次旅程，令我对藏传佛教加深咗了解，咩红教、黄教、花教...莲花生大师、宗喀巴大师、达赖、班禅...当然，仲有西藏本土嘅苯教，以及果对独特嘅男女图腾。从佛像到教规等，藏传佛教同汉传佛教係明显唔同嘅。藏民基本上係全民信教嘅，佢哋嘅虔诚令我非常震撼。坐车嘅时候，经常都会见到好多人一路磕长头一直到拉萨；一大清早，就会有一堆人喺大昭寺门口五体投地；路上随处都可以见到拿住转经筒嘅人，寺庙旁边嘅经筒亦係无时停嘅，经幡亦都係到处迎风飘扬嘅。大昭寺似乎係藏传佛教甚至佛教嘅中心，每个到西藏嘅信徒都一定要去果度，因为里面供奉住世界上唯一一尊释迦牟尼生前亲自开光嘅等身像，朝拜佛像就等于面见佛祖。要注意嘅细节係，进入任何藏传佛教嘅寺庙都要顺时针走，亦即係从左往右走，左脚入右脚出，转任何东西都係要顺时针，门槛係唔可以踩嘅。而苯教就正好相反，乜都係逆时针嘅，不过普通游人就好少有机会去到苯教寺庙啦。一般嚟讲，大昭寺8点前係向信徒免费开放嘅，如果你想逃门票嘅话可以早啲去趁人多混入去，但要注意，佢哋係唔做礼拜嘅，亦即係话礼拜日信徒係唔入去嘅，寺庙要到9点先开门向游人开放，我哋就係知啲唔知啲而做咗次傻仔，白白早起了。仲有，喺西藏捐香油钱係有找钱嘅风俗习惯嘅，唔好诧异，你可以自己从容器里取回零钱，留下要捐嘅数目即可，捐多少无所谓，但千祈唔好拿多，佛祖会知道的。呢个亦可以作为唱散纸嘅一种方法。
人
一般嘅藏民都係纯朴、善良而热情嘅，佢哋保留住好多传统同习俗，并与现代文明相结合。如果纯朴嘅意思係与钱无关嘅话，有啲藏民就已经有啲变质啦。喺好多景区或者街道，会有唔少细路甚至大人问你拿钱，虽然唔会好似广州抱住你嘅脚唔俾你走咁猖狂，但係都不乏死缠烂打之术。而喺景点，会有好多人围上嚟向你兜售商品，或者问你要唔要同牦牛、马、藏獒甚至佢自己影相...而好多公共厕所，纵使卫生条件好差，有时甚至恶劣，总觉得有掉落个坑嘅危险，但门口总不乏莫名其妙嘅收费者，费用由2毛到1蚊不等，唔会放过任何一个人。所以话，喺西藏要唱定好多散纸旁身先得啊。不过有啲地方，小朋友係唔会要钱嘅，如果你俾食物或者文具之类佢哋就会好高兴啦，我想呢啲就可以称得上纯朴吧。讲下TT嘅果啲学生，都非常可爱同单纯，而且都好怕丑，成日低着头细细声讲嘢。佢哋似乎食唔惯我哋从广州带去嘅芒果，口头上就话好好食，但从佢哋嘅表情我睇得出其实佢哋觉得味道好怪。啲女生好热情，将佢哋嘅藏装拿出嚟俾我哋试穿，哈哈，我着得都几靓嘎。仲有一件超级搞笑嘅事，LT最中意嘅果个学生，次达杰同学仔，曾经低着头非常腼腆咁同syy讲咗一番超爆笑嘅说话，我喺一旁忍笑忍得好辛苦。至于讲咗啲乜，私聊哈。不可不提嘅係校运会，啲小朋友1500/3000/5000係咁跑，大佬，5000米係12圈半喔，高原喔，我听到都想晕啊，但佢哋报名好踊跃，而且跑得好快，仲有人三项都有参加而且都拿到名次，超人啊。而好多学生都係能歌善舞嘅，随便抓一个都可以又跳又唱，劲啊。再讲下朋友仔啦，喺林芝果阵，芬、霞、陈坚都係原本就认识嘅，今次又更加熟悉啦；肥HK就只係喺机场出现咗那么一个钟唔到，欠我20餐饭哈。到咗拉萨，新认识咗几个朋友仔，佳佳、宋健、凯君、周梅姐，佢哋都係好好嘅人，而家我好挂住佢哋啊。我哋寄居喺佳佳宿舍，虽然成日有用水问题，但过得好开心，佢亦好照顾我，而佢喺民族商场嘅人面以及杀价功力，令我封佢为偶像啊；宋健就成日学我讲“疯掉了”，其实佢自己就真係疯掉了。至于TT同syy，临行前个个都话我去做电灯泡，其实不然，我係起到一个催化剂嘅作用，有我喺度，佢哋会更同心协力咁照顾我——因为我实在太麻烦啦，反而会增进佢哋嘅感情，矛盾都少啲啊。非常感谢呢次西藏之旅向我提供帮助同照顾嘅所有朋友仔，无咗你哋我真係唔知点算，真嘎。
动物
西藏嘅动物不外乎就係牦牛、绵羊、藏香猪。无论有草定无草，平地定山地，你都可以见到无数嘅牦牛，远睇一点点黑色嘅，仲以为係石头。牦牛就係劲，可以自己爬到半山腰去，食嘅係虫草，饮嘅係山泉，好补啊。而藏香猪嘅体积就只有内地猪嘅二分一，如果係幼猪嘅话就更细啦，好似猫仔咁大，成只黑妈妈，可能係晒黑的吧，哈哈。喺西藏先知道乜叫做“牛”，动物行路唔使按线，转弯唔使打灯，过马路亦唔使睇车。成日急刹车都係因为有一只或者一群牦牛或者猪无拉拉冲咗出嚟。
自然景观
林芝係西藏嘅江南，远处有雪山，山坡有绿树，地面有河流，好奇特嘅景观。听讲9月或10月嘅话更靓，到处红红绿绿，乜颜色都有。西藏林海就喺从林芝去鲁朗嘅路上，好壮观。而南迦巴瓦峰又叫美女峰，想一睹佢芳容就要睇下你嘅运气啦，我哋嘅运气就唔算太好，云雾遮住峰顶，不过都有朦胧美啦。色季拉山、米拉山口果啲，就係高、冻同有雪，景观都唔错。西藏三大措（湖）：巴松措、纳木措、羊卓雍措就各有特色啦。巴松措秀美，有啲九寨沟嘅feel，一片清澈嘅大湖，湖中心有个岛，岛上有寺庙，远处有雪山，仲有啲似富士山添。纳木措就比较壮美，海一样嘅湖，一望无际，远处係连绵不绝嘅雪山，真係画一样，我哋去果阵湖面仲係结冰，只有岸边融咗少少，不过好奇怪，岸上嘅石头都係暖暖嘅，坐上去好舒服。纵使我果日身体感觉非常唔妥，但亦被眼前嘅美景所震撼，不枉我一直痛苦地坚持着。而羊卓雍措，被群山环抱，狭长嘅湖面，蓝蓝嘅湖水，俾人好宁静嘅感觉。
人文景观
如果话林芝係睇自然景观嘅话，咁拉萨、日喀则主要就係睇人文景观啦。布达拉宫、大昭寺、扎什伦布寺，都充满咗宗教色彩，以及浓厚嘅藏文化传统。西藏嘅丧葬方式主要有五种，地位由高到低依次係：塔葬、火葬、天葬、水葬、土葬。布宫同扎寺里面放嘅灵塔就係最高级嘅塔葬，据说里面仲有达赖喇嘛或班禅大师嘅真身法体，非常神奇啊。寺庙墙壁上仲会有好多壁画，都係用天然嘅颜料绘画——如绿色就用绿松石、红色用红珊瑚、金色用黄金等制成嘅颜料，都係十分名贵嘅矿石、宝石，所以经历上千年都唔会磨灭。上面仲包含咗好多故事传说，对了解西藏嘅历史非常有帮助，可惜我唔係好识睇。布宫建得好高，你要知道，喺高原爬楼梯唔容易啊，我就行到上气唔接下气啦。不过如果去布宫嘅话，建议一定要去一下出口嘅果个厕所，会令你有“飞流直下三千尺”嘅感觉嘎。而喺西藏想揾厕所都唔容易嘎，特别係开车，动不动就几百公里，边有咁多厕所喔，所以好多人都会选择喺路边解决，我亦都享用过咁样嘅天然厕所，别有一番风味，当然，一般仅限于开细哈。不得不提嘅係，西藏亦有比较敏感嘅政治问题，已经超出呢度嘅讨论范围啦，如果去西藏嘅话要注意，亦都唔好随便讲随便讨论就係啦。
又长篇累牍咗一通，希望无闷亲大家啦。之前果个星期，每日都可以见到布达拉宫，日景夜景，觉得佢已经全无神秘感啦，而家见唔到，反而有啲失落，有啲挂住佢啦。我开始有啲理解点解西藏学生学习好似总比人慢一啲，除咗基础教育差啲之外，高原缺氧影响脑部活动能力可能都係一个因素。喺西藏果10日，我总觉得记忆力有啲问题，成日有种梦一样嘅感觉，而家想下果10日发生嘅事情，既虚幻又真实，不过我相信，我真係去过嘎！
好挂住西藏果班朋友仔啊！西藏呢个地方，虽然自助游异常发达及完善，但如果有熟悉嘅人嘅话真係可以免却好多烦心事。真係好多谢大家嘅照顾同帮助，我哋有缘再聚哈！ 第一次进藏，爽hey，我平安番嚟啦，而家至今都仲未有乜异常。相信好多朋友仔都估到或者知道啦，我利用呢个五一长假，加上之前逃咗两日课，去咗果片遥远且神秘嘅土地——西藏。以前总觉得西藏係果种要有周详嘅计划、充分嘅准备先会去嘅地方，但似乎LT嘅支教使一切都变得简单了。呢次嘅出行，syy係早就计划好嘎啦，而我就绝对可以用“仓促”二字嚟形容：出发前两日晚上确定去，打咗一轮电话发现机票已经无晒，但第二朝竟然奇迹般又有票啦。于是，28号拉住个箱直奔机场啦。
呢次旅程，短短10日，好多见闻、感受，以及呢片神奇嘅土地带俾我嘅冲击都无法言传。在此，我只能记一下流水帐，分享下我嘅一啲体会，亦为有兴趣进藏旅行嘅朋友仔提供一啲参考啦。
行程(2007.4.28-5.7)
D1:傍晚，同syy汇合，搭上南航嘅飞机。航班误点，服务亦好一般。到达成都时已经9点多啦，喺离机场仅几百米嘅某宾馆住下，有专车接送，只要几分钟，尚算方便。进藏前最后一次冲凉，俾心机洗干净啲。
D2:晨早7:30嘅飞机（航线垄断，收买人命啊），我哋仲冒死食咗个早餐，6:50到达机场，好彩人唔算太多。国航服务似乎比南航好，起码有枕头同耳机提供。食过早餐再次昏昏欲睡，醒过嚟时，只见窗外白茫茫一片。我哋唔係坐窗边，从我嘅角度睇觉得果啲应该係连绵不断嘅峰顶积雪，而syy却坚持果啲只係云海...最后确定，都係山峰！何其壮观啊！后来先知，成都－林芝嘅飞机用嘅係最先进嘅导航设备，同埋最有经验嘅飞行员，因为飞机将要喺两山峰之间飞驰而过...飞机着陆喺林芝米林机场，果然係高原啊，从下降到着陆嘅时间明显短啲。一个比火车站还要小嘅机场，每日着陆、起飞嘅航班各一班，早上10点后就可以收工啦。手捧哈达嘅TT已经等候多时，见面时嘅激动与兴奋就唔使多讲啦。蔡校长开车嚟接我哋，沿途都有唔少景点：雅鲁藏布江与尼洋河嘅两江汇合处、喇嘛岭（藏传佛教红教寺庙），数不清嘅经幡、马尼堆...蔡校长见多识广，係一个好好嘅导游，旨意LT就...去到林芝一中已经中午12点几，佢哋嘅校运会仲未结束。林芝海拔只有2000多米，所以无乜特别反应，但2点左右食过饭我都係返宿舍训一觉先，好舒服。晚饭后逛咗一下街道，晚上就睇文艺晚会，仲走访咗一下学生宿舍。
D3:训到自然醒，继续去睇校运会。係啦，我仲见到当年叶sir援藏时候所建嘅教学楼，可惜，佢未等到剪彩就要走了。中午校运会结束，未等食饭，我哋就载上次达杰直奔鲁朗（林芝地区嘅一个镇）。次达杰係TT最中意嘅学生，鲁朗人，送佢返屋企之余帮我哋做导游。路上经过色季拉山口，远眺云雾中嘅海拔7787米、人类尚未征服嘅南迦巴瓦峰，俯瞰林海同西藏小瑞士。到达鲁朗已经4点多，去学生屋企嘅店铺坐咗一下，佢妈妈好热情，拿酥油茶同藏鸡蛋招呼我哋；佢爷爷更可爱，係一个典型嘅藏族老人，身穿贡布服饰，腰系佩刀，不懂汉语，但总对住我哋笑，特别係叫佢一齐影相时，表现得异常活泼。我哋仲喺餐馆食咗传说中嘅石锅鸡，非常好味啊！回程时去了八一附近嘅另一个女生屋企，同样热情嘅一家人，屋子亦非常有特色，走出阳台就可以望到尼洋河，用我哋嘅话嚟讲就係一线江景啊！晚上LT嘅教研室聚会，syy被屈数杯，我深表同情...
D4:又係大清早，包咗一部车，出发往拉萨。路上兜咗去巴松措（措就係湖嘅意思），仲会经过米拉山口，海拔5013米。喺车上颠簸咗六七个钟，逐渐离开西藏嘅江南——林芝，绿树越嚟越少，山开始有啲秃，进入拉萨之后基本上係无乜树嘅。见到佳佳佢哋，一齐食四川火锅，当然係鸳鸯锅啦。我哋就借居喺佳佳宿舍，我与LT同床，两次差啲被蹭下床...
D5:由于训得唔好，好早就望住天花板等天光，起身时有感冒嘅迹象，李医生马上喂咗两粒康泰克。食咗药我就晕上加晕啦，但唔理三七二十一，纳木措一定唔可以错过。喺车上，我一直好似游魂咁，昏昏沉沉，训咗又醒，醒咗又训。不过，青藏铁路、念青唐古拉山口我都总算无错过。到了纳木措，海拔4700米。成个人都觉得唔舒服，但係又讲唔清具体边度唔妥。但係，我确确实实被眼前嘅美景感动了，纵使再辛苦，我都挨住行落去。回程时，我觉得我嘅高原反应嚟啦，好辛苦，当去到那根拉山口果阵我已经无力落车啦。路过羊八井，本打算去泡温泉，但由于时候唔早，加上大家都累啦，所以取消了。翻到去，周梅姐煮粥俾我哋食，我摊喺沙发度唔郁得啦。
D6:呢日唔敢轻举妄动，好好休息一日。训到自然醒，已经中午。山东煎饼做午餐，然后就喺拉萨市内闲逛，并为第二日嘅日喀则之旅准备。晚上，与同来西藏旅游嘅几个中大校友食饭，他乡相遇，的确係缘分，要聚一下。听讲布达拉宫有夜景，我哋就等到夜幕降临之后去睇。我哋要用一部傻瓜相机，喺无脚架嘅情况下，影出专业嘅水准！一个好嘅角度，加上好嘅idea，再借助一啲物件，一张布宫夜景就成就啦。
D7:一早就跟团去日喀则，我同TT迟到了，全团人等我哋，真唔好意思。上午去咗羊卓雍措，下午去咗扎什伦布寺。大家可能未听过扎什伦布寺吧。布达拉宫係达赖喇嘛嘅地头，而扎什伦布寺就係班禅大师嘅居住地，以及历世班禅灵塔安放之处啦。
D8:呢一日基本就係坐车返回拉萨同去购物点。路上都远远咁睇咗一下天葬台同制作藏香嘅地方。讲起天葬，大家都好好奇吧，我开始都几好奇，但听过之后就觉得有啲恐怖...咁讲吧，大家可以将佢想象成解剖同肢解嘅结合，然后再加上秃鹫争相抢食人肉...差唔多就係咁啦。
D9:今日主要就係去布达拉宫同大昭寺。布宫唔使多讲大家都知啦，分为红宫同白宫，白宫係以前政教合一嘅时候达赖喇嘛办公嘅地方，白宫就係历世达赖灵塔安放嘅地方。至于大昭寺，可以讲係藏传佛教嘅中心，因为佢里面供奉住文成公主带入藏嘅释迦牟尼12岁等身像，係世界上仅存嘅佛祖等身像。佢仲有好多传说和故事，我听得津津有味。当日，呢日仲係一个特别嘅日子，TT生日哦～下午疯狂购物之后，我哋去庆生兼饯行，毕竟，听日大家就要各散东西啦。
D10:我係呢日飞番广州，TT就跟肥HK佢哋嘅车返林芝，syy就係8号嘅飞机。佢哋一齐去送我，喺机场终于见到肥HK啦！喺我到林芝之前，佢就去咗玩啦，阿里、珠峰、山南...呢日佢又係送人机，然后就返林芝啦。仲係咁肥，到处玩都唔见佢瘦。又话6号到拉萨请我食饭，点知玩到7号先喺机场出现，佢而家欠我20餐饭啦。讲番果个贡嘎机场，比米林机场大多了，起码似番个正常嘅机场。又係喺成都转机，一个人喺机场好无聊，打电话俾被流放成都嘅死变态，倾计打发时间。
好长嘅流水帐啊，都唔知自己讲咗啲乜，真无瘾。欲知详情如何，请看下回分解啦。 2/24/2007 新年快乐猪猪年，本命年哦～记得对上果次本命年，觉得12年好遥远，而家话咁快就到啦。只希望未来12年唔好咁快过就得啦。大家新年快乐哦！
呢我嘅相册就知道啦，呢个假期最有意义就係头尾三日嘅深港访友游同埋旧同学聚会啦。广深线嘅误点情况真係令我十分恼火，枉费我晨早爬起身嘅毅力以及体力。係候车室滞留咗一个几钟，睇住后面时间嘅车一部一部咁到站，我部车连影都无啊...我买果部係新型车嚟嘎，价值80大元嘎！后来忍无可忍啦，求其有部车就照上，好空，有位坐，以为好好彩。过后得知，果部车票只值65蚊，好dum啊!!!算数，平安到达深圳就好。深圳地上地下交通都算方便，小敏带住我哋逛匀高中低档shopping嘅地方，讲讲高级嘅啦，里面我净係认得LV，其他嘅都係一堆不知名英文，引用发发嘅话：LV旁边嘅唔通係佐丹奴咩。嗯，好有道理，深圳嘅人好有钱哦～应该话，深圳好多有钱人哦～尤其富婆～夜晚仲同YJ、XW食咗餐饭，倾得好开心，饭后仲逛咗一下，搞到午夜先翻到小敏宿舍。三条友倾到好夜好夜，第二朝我独自起床，到罗湖同坐早班车嚟嘅田田汇合过香港。由于种种原因，发发喺茶楼等到藕咗我哋先到。早茶真係好好味，啲阿婶态度又好，食得都开胃啲啊。辗转于多种交通工具之后，我哋去到山顶凌霄阁，转嚟转去，咁就玩咗一个下午，好过瘾。唔知道係咪太饿嘅关系，我哋发觉B记嘅包包其实好食过M记好多哦，快啲进军广州市场啦～因为约咗靓仔James喺深圳幽会，田田落山之后喺旺角逛咗一阵阵就匆匆翻去啦。不过佢又劲喔，经过发发嘅指点，竟然可以喺繁杂嘅街道中揾到通往九铁站嘅路，掂啊。我同发发就继续喺旺角shopping，采购啊～买咗一大袋，只有几小瓶係我嘅。发发送我到九铁站，我哋就分道扬镳啦，发发仲吓我，搞到我成日提心吊胆。翻到宿舍，小敏都已经训醒一觉啦。终于，125-710人齐啦，半年后再次聚首一室！
翻嚟之后又有同学聚会，晚饭夜茶直落两场，先八后五，我想呢个都係以后嘅大趋势啦，无谓想咁多。大家都做嘢啦，而且都几辛苦，但係我都暗暗地羡慕佢哋。嗯，我喺时候到社会闯荡下啦，哈哈。噢，仲有仲有，唐唐有带埋囡囡嚟哦，好cute嘅呢！
从唔知年廿几开始，每日都有节目，日日都大鱼大肉，真係好易变猪啊...虽然过年都係一啲常规嘅活动居多，但係都好开心，毕竟一年只有一次而已嘛。可能长大了，对利是亦都无以前咁在乎啦，看重嘅係同屋企人、长辈、朋友相聚嘅幸福。
猪嘅生活好快就要结束啦，好唔舍得哦～ 2/7/2007 放假首语我嘅热情俾一次又一次嘅页面错误淋熄晒，今日终于爬上嚟啦，真係可喜可贺啊。
最近遇到一个头痛嘅问题。3.31,480,long time no see...要三个条件都符合，去边度揾啊？有可能嘅都无雷公咁远。难题...难题...
放假放咗两周多啦，过住猪般嘅生活。早上日上三竿先起身，食饭，玩耍，再食饭，下午有兴趣仲可以去放下狗，真係爽啊～不过该做嘅都未做，喺时候收拾下心情赶赶啦。讲住咁多先，不过唔知下次再可以爬上嚟係几时咯。网络大叔，稳住，稳住啊。 10/8/2006 7日其实好短国庆呢7日做咗啲乜？
第一日番清远舅父度，带埋dede去
食大碗粥、清远鸡
大人打麻将，我就玩手机游戏
发觉自己真係一个耐得住寂寞嘅人
一个无聊嘅游戏，都可以玩一个下午
大包细包去，又大包细包咁走
喺屋企发毛咗一日
跟住果日想去契娘度，点知打爆电话都无人接
转而去咗嫲嫲度，闲聊
首次谈及某些事，揾到咗共鸣
亦都知道咗某些事嘅真相
感慨：真係要揾一个好老婆啊！
应该到第四日啦，与莎娜结伴同游
晨早爬起身去莲香楼饮茶，邻台并无同龄人
除咗果只乌蝇同啲服务态度，其他都ok啦
食得好饱后逛上下九
好惊裤会买大，好快，每人都多咗一大袋嘢
继而搭铁去陈家祠
建筑工艺依旧，只係里面都变商店，纯粹呃鬼佬钱
流连咗近三个钟，再铁去北京路
似乎只为咗食寿司，其他无物所获
次日，同细佬陪嫲嫲去动物公园，乖孙吧～
佢係故地重游，其实我哋都係
嫲嫲最中意睇马骝山，驻足好几十分钟唔肯走
佢成日讲：其实动物同人一样，好有性嘎！
归途上接到契娘电话，佢刚从香港回
我顺路去了，收到一份礼物——好贵重嘅礼物哦！
话咁快就到中秋啦
晚上一大家人食饭，好开心，可惜只有13个人
番到屋企小区又放烟花
联合埋契妈佢哋，捧晒水果、月饼、栗子等等
喺江边，赏月、赏烟花
烟花就喺你头顶炸开，那个恐怖啊。。。
最后一日
争取时间。。。训觉！ 10/5/2006 国庆网络故障咗几日，急call人嚟修，终于搞掂啦。做服务行业真係唔容易啊。
大家国庆快乐哦！“国庆”，对于而家嘅人嚟讲，变成咗一个节日假期，好少人会理会其实佢更加係一个纪念日。提到国庆，大家都会想到黄金周、七日长假、旅游、购物等等。我都唔知几耐无想到过呢个节日究竟係为咩而过嘎啦，今年我却不期然咁思考起身，哈，觉悟高咗啊。话咁快，建国57周年啦。前前后后嘅历史应该唔使我细说啦，我中史学得不怎么样，大家应该比我更清楚。我只係想讲，大家喺度假、shopping、温书、加班甚至喺屋企发毛之余，回忆下呢段近现代史，喺心里面纪念一下下，惦记一下下我哋嘅国家，咁就好好啦。
呢几日有好多台播战争片，平时我係无咩兴趣嘅，但呢几日都有陪daddy睇。其实我好中意陪daddy睇电视，纵使果啲戏我平时根本唔中意，我都会乖乖坐喺旁边，仲好似好好学咁问个不停。渐渐地，发觉果啲戏都係几有意思嘅。 9/4/2006 快开学咯呢几日基本上都出去，约会唔同嘅人，做唔同嘅事。星期六就去咗装机，折腾咗差唔多一日，原来装机係咁繁琐嘎，好彩有两位“猛男”协助。
外省番学嘅基本上都走晒啦，外国番学嘅就有走有未走。而我，后日报到。啲一箱箱一袋袋嘅嘢都已经堆晒上宿舍啦，听日就番去搞卫生，整理整理。琴晚搬电脑番去嘅时候遇到係以前熟悉嘅宿管姐姐值班，倍感亲切，仲俾咗我“免签”优惠。悠长假期眨下眼就结束啦，总觉得去完旅行番嚟之后就好似坐上咗时空穿梭机咁，唔知发生咩事就到8月底啦。好唔舍得，除咗唔舍得假期，更加唔舍得果啲只有放假先会见到嘅人。
番学读书嘅生活熟悉得嚟似乎有啲无味，有时都好向往大家翻工嘅体验与生活。可能翻工嘅人见到会想打死我。呵，读书嘅人想做嘢，做嘢嘅人想读书。人就係咁，总羡慕人哋嘅，而就係唔懂得满足。 8/31/2006 diary今日同三个男生去打保龄，我竟然唔算最差果个，真係牛屎啊，哈哈。手又要痛啦。
前几日一本初三时嘅日记本回归，好有兴趣咁一直翻看。帮我回忆起好多早已忘记嘅事情——无论小事大事，亦都帮我想起好多早已忘记嘅感觉、感受。哇，原来7年前嘅自己係咁嘎，似乎好熟悉，但又有少少模糊。其中记载咗一啲“撤换”老师时嘅风风雨雨，其实当时嘅压力都几大哦，年纪小小，胆量同勇气都唔细啊！惊然发现原来当时我仲要係班长——点解咁都会唔记得嘅？？？有啲吃惊之余真有啲佩服自己。
越嚟越怀念以前嘅生活，虽然学习好忙，但似乎每日都过得好有趣。无论开心定唔开心，每日都好充实。仲有，原来我以前就好中意睇电视嘎啦，而且成日都可以睇到唔同嘅戏、节目，真感觉自己係铁人。最过瘾嘅係，日记里面通常都係写真名，好少写花名——都唔知点解，而家睇番就觉得好好笑啦，好似好生外咁。哈哈，以前真係好可爱啊！ 8/28/2006 又k啦今日又去唱k，应该係今个假期last了挂。今次係我同小钰发起嘅，然后发展咗教父、林艳、某人的某人、highgo就再无力开拓啦。后来highgo单线联系埋翔哥，但係约到唔拖唔水，最后佢自己又竟然临时甩底，搞到我哋同翔哥经过一段搞笑嘅对话之后，一头雾水嘅翔哥先自己摸索嚟到。唉，呢个时世，想揾到得闲嘅人真係唔容易啊，出国嘅出国、翻工嘅翻工。n日后，呢班人都出省、出国、翻工，就净番我一个孤零零啦。。。车，做咩讲到自己咁闲极无聊咁姐？！话晒都係×××嘛，肯定忙到要死嘎！嗯，一定係啊！我要忙死啦！唔得，我而家要尽情再玩下先！
讲番唱k啦。我哋女生成日都要揾原唱一齐唱，真係失礼，不过从另一个角度讲，我哋勇于向高难度挑战，唔唱行货嘛，哈哈。印象中第一次听教父唱雪狼湖，以前坊间传闻就听得多啦。哇，果然，我当时问小钰最多嘅问题就係：你关咗原唱未啊？我忍唔住问咗好几次，因为唱得真係好有张学友feel，太劲啦！感觉其他歌係无咁似嘎，雪狼湖真係好似，难道教父专登练过嘅？而某人的某人唱女声就认真。。。吓人啊。。。太恐怖啦！
现场亦都一度变咗出国研讨会，只可惜highgo无嚟。不过教父倾计、唱歌两不误，果然高手。哈哈，我发觉某人的某人同翔哥唱嘅有啲歌真係好鬼另类，而且好搞笑，而某人的某人嘅果啲仲有啲。。。丑！（唔好意思，只係实话实说姐，得罪晒啦，包涵包涵） 8/26/2006 one day今日原本係同小钰去革新路买嘢嘅，但只係行咗一个钟多啲就去咗K仔食嘢。一坐低就开始鸡啄唔断，其实都唔係讲啲咩有建设性嘅嘢，只係啲生活小事，同自身有关嘅事情，越讲越兴奋，越讲越开心。唔经唔觉，一睇表，已经快6点啦！我哋足足倾咗4个钟！一次愉快的会谈。
我同小钰都有倾到新同学、新室友嘅问题，然后今晚就得知分宿舍结果，以前果栋四人间，8楼，更上一层楼啊！同飞鸿一间，另外两个係其他专业嘅。以前嘅四人间，我都几中意嘅，只係担心另两个室友唔知会係点，如果係好似珠海果时咁“相敬如宾”就郁闷死啦。听讲全部中大保/考嘅女生都可以分到二人/四人间，而外校嘅大部分都去了条件差好多嘅六人间。自己得咗便宜，但又觉得良心不安。有人话想用二人间同我和飞鸿换，搞到我有啲心思思添。不过其实两个地方都有利有弊嘅，好难抉择。飞鸿又好似唔係咁想，应该就换唔成嘎啦。
今晚又接到李田远在西藏打嚟嘅电话，佢哋一早由上海飞西安再转机拉萨，然后坐车去林芝。打电话时正在车上，听讲刚从海拔5000几米嘅米拉山口落嚟，大家都好开心。我同支教嘅五个人都轮流讲咗几句，大家身体状况都好，无咩不良反应，而且听得出佢哋都好兴奋，不停向我讲述头先见到嘅美丽景色：蓝天、白云。。。仲有黄恺嘅六中大褛。李田被分咗去教中学，呵呵，教小朋友，啱晒佢啦。佢仲委托我向大家报个平安哦～嗯，希望大家都一切安好啦！
哈，太阳系“开除”咗冥王星喔，真有趣。20年嚟都係叫“九大行星”，而家开始要改口咯。不过冥王星都几惨，做咗70几年一等星，而家话贬就贬咯。不过呢样都证明，科技係进步嘎嘛！ 8/24/2006 dog dog呢两日，妈咪搞咗一样佢自认为好有意义，而我就觉得好搞笑嘅活动——帮我哋屋企果只狗乸配种。三只狗公，一只狗乸，其中一只狗公係狗乸嘅爸爸。关键并唔在于交配，而在于前前后后四只狗仔嘅表现、反应。其实啲狗仔嘅感情有时係同人差唔多嘎，争风呷醋，互相睇唔顺眼，真係笑死我啦。
而家两只外来狗公都走晒啦，但係Dee爸爸仲嘤嘤哼哼吵咗一晚，心情唔好，仲绝食添。哈，真係狗仔也疯狂啊~ 8/20/2006 今日20号话甘快又20号啦，准备要番学咯。喺屋企懒惯咗，真系好唔想番去上课哦。但系唔想都无办法嘅，人总要面对现实，收拾心情啦。
走嘅走，留嘅留。唔知点解，今年特别多人走，希望大家都好啦。各自面对新生活啦～ |
|
|
