今晚做咗一晚GMC决策，5个人，手忙脚乱的。同一两年前根本无咩进步嘛！

 

唔得，我要认真做公式啊！

    以下係5.30晚上断网前后所写嘅。。。

 

    紧张咗好耐，终于等到答辩啦。坐喺课室里面，依然好紧张，好怕老师问啲奇怪嘅问题。今日嘅老师同琴日嘅唔同，好难捉摸提问风格。小敏係第一个，present完之后，三个老师轮番发问，问得小敏有啲不知所措，成个过程持续咗近半个钟。后面嘅人虽然无拖咁耐，但基本都係被问好几个问题。普遍认为，大家都被批得几厉害。但冷静想下，其实老师只係指出我哋论文嘅缺陷，再提出一啲问题同我哋讨论下，有时觉得佢哋搞到好似讲课咁。每个老师嘅提问都有其特色，同佢嘅研究范畴好有关。老师们指出嘅都几有道理，而且态度几好，严格嚟讲都唔可以算“批”嘅，只係我哋嘅论文确实有所不足姐。K老师当场就话：不用紧张，只是跟你们讨论一下论文的问题，对你们以后很有帮助的。不过当时依然好紧张，呵呵。

    我係第7个，企喺上面有种PK嘅感觉。老师提咗两个好致命嘅问题，看上去被批得好惨。但对于我自己嚟讲，反而觉得好舒坦，因为呢两个问题我做论文嘅时候都曾经想到过，只係当时已经无力再挽回啦，只好硬住头皮继续，所以问呢两个问题总比问一啲意想不到嘅问题好。老师嘅眼光果然锐利啊！无论结果如何，总算搞完啦。多谢各位亲朋好友嘅关心同鼓励！各位还在努力论文嘅兄弟姐妹们加油哦！

    忙咗几日，今晚突然咩都唔使做啦，有啲空虚，有啲无聊。论文搞掂，学习上嘅基本都告一段落啦，接落嚟嘅就係等毕业，毕业旅行、毕业相、毕业典礼之类。唉，本科学习咁就结束啦，有啲不舍。

 

      一整日都喺度努力准备我嘅presentation，尽量唔好俾人批得咁惨。但仍然听到很多恐惧嘅事情。

      喺学校竟然MSN/space/hotmail咩都上唔到，从琴日开始仲发展到连网都上唔到添，激死！难道我呢排人品真係咁差？要想下办法改人品啦，嗯。有人劝我换个空间，space成日唔稳定。哇，呢个係何等巨大嘅工程啊！对于我呢啲懒人嚟讲，我宁愿忍下先，何况我专一兼长情嘎嘛，哈哈。

      今晚係小敏第一次煲西米露糖水，我哋梗係支持佢啦，点知煲落咗之后先发觉宿舍无开椰汁罐头嘅工具，然后又发现无糖。。。惟有叫仲喺校园散步嘅李田买上嚟，真係有啲出师不利啊！差唔多12点煲好，水同椰汁一齐太多啦，搞到好稀，好大一煲，味道仲有啲怪。我捱义气食咗两碗，食到一肚水，已经去咗几次厕所啦。

      嗯，今日我终于番咗嚟学校啦，第一日上课，感觉都唔算陌生。两个课嘅老师都比较搞笑，可以讲好cute，讲得都几唔错。不过下午果个老师恐怖啲，实习、面试等等请假都无得，无去听课就当无到，三次无到就取消考试资格，揾工嘅同学就惨啦。其实佢都唔係一个坏人，只係唔係好了解大四下学期嘅状况，而且非常希望我哋去听佢嘅课姐。今日係第一节课，佢仲专登着西装打tie，唔识果啲字又专程查字典以便点名——劲，可惜，由于口音问题，都係读错唔少。

      呢几日迷上咗达芬奇密码，几好睇！

      琴日，坐喺电脑前面敲咗一日，直到深夜，终于完成咗近7000字嘅文献综述。我算仁至义尽啦，再写嘅话我惊我会呕啊。所谓嘅文献综述，我嘅做法就係喺博“览”群“书”之后，好似砌puzzle咁，将啲理论东拼西凑hum成一篇文章，当中无几句话係我自己嘅，感觉颇为无聊。其实应该有更高明嘅做法，只不过我知识有限、时间有限，最重要嘅係兴趣有限而已。好彩屋企啲电脑都係液晶嘅，如果唔係对咗咁耐辐射都射死我啦。不过等阵我就要番学校，开始另一项有聊少少嘅工作，古老嘅显示器，惨咯。。。

      好多人都话睇得英文文献多，英文水平都会突飞猛进。点解我就唔係好觉，可能我浏览嘅速度实在太快，一般书就主要睇content/summary，文章就主要睇abstract，细睇嘅时候又唔好好用心，试过连续几次都係查同一个单词。有时甚至不求甚解，大概明就算数。而我最中意嘅就係借本中文译版番嚟中英对照，嘻嘻，不过我经常都会发现唔少翻译错误或者唔恰当嘅地方。嗯，咁唔得嘎，要好好学英文先得啊！听过睇过好多同学仔嘅面经，发觉英文真係好重要哦！

      hoho，有两个好消息。第一，前几日听闻唐唐喜得一千金，全体同仁恭喜恭喜！唔知点解，中学嘅班主任都係生女嘅，我中意嘅明星亦都係生女嘅。妈咪话“生仔好听，生女有福”，呵呵，咁睇嚟佢哋都几有福。第二，爷爷今日出院咯！daddy今朝去接佢番屋企，都成个几月啦，终于基本痊愈，辛苦晒。

      仲有几个钟就考试啦，想住上网准备一下案例吹水，逛下逛下就逛到嚟呢度，咁就留言几句啦。而家宿舍除咗李田之外基本都未训，仲喺度努力奋斗紧。李田好劲，今晚先开始温习，但係俾我骚扰佢，时不时揾佢倾下计，搞到佢无咩点睇。我都唔想嘎，温习实在太郁闷啦嘛，成晚流流长，想揾人倾下无聊嘢。不过牛唔饮水又点按得牛头低呢，其实佢都想倾，逃避温习。佢而家就话先训1个钟，然后再起身睇。1个钟过去啦，我哋三个轮流叫佢，佢都仲喺度赖床。直到我哋讨论新东方嘅老师，飞鸿提到“李永俊”呢个名（唉，佢呢排中毒啊，痴迷紧呢条友），佢突然插话，真係吓咗我一跳，不过之后好快就训番啦，郁闷。。。

      Oh，飞鸿上去训啦，李田终于起身睇书啦，小敏继续处于模糊状态睇紧书。嗯，我都差唔多要就寝啦。Good luck all!

     

      考试改时间。。。咁稀罕嘅事今年都俾我哋碰上啦。。。

      今日我顶唔住宿舍嘅寒冷，决定逃回家可以喺被窝里面温习，就call咗daddy去医院接头，探爷爷顺便载我一程。离开宿舍之时，我循例交待咗李田几句：有咩考试料通知我，考试改时间通知我。顺道提下爷爷，比起前几日，今日爷爷嘅精神好咗好多，仲喺度听收音机、睇报纸，应该好快就可以出院啦。一路上，我同daddy探讨咗一下我哋工管嘅就业情况，又讲咗一下今日招聘会揾工嘅同学们都好惨，天寒地冻，偶尔仲有飘雨。差唔多到屋企啦，熟悉嘅“遇见”响起，係李田嘅电话。佢话战略考试改时间啦，开始话改喺听日，叫我快啲番去，我唔信。后来讲出真相，係改喺下星期二，为咗就去面试嘅同学。咁多年嚟，真係未遇过考试改时间嘅，仲要係考前两日改，大四真係咩新奇事都有啦。群上面都公布咗啦，但係始终觉得自己发紧梦。佢完全搞乱晒我嘅复习计划，突然今个星期一科考试都无，下星期就有两科，相隔一日。真係计划赶不上变化，计划一乱，又要重新积累复习热情啦。不过唔紧要啦，之前嘅热情应该仲可以延续嘅。

      呢排好似好混乱咁，全球营销管理补课又调完一次又一次，而家考试又调，好无安全感。不过揾工嘅同志们都未出声，我又有咩所谓啊。揾工加油啊！

      唔知点解，眼见飞鸿已经复习得如火如荼，但係自己一直都无咩热情。可能到咗大四，心都散咗啦。唔知保研嘅考试唔过会有咩后果呢。。。

      琴晚李田番屋企拿被同冬天衫，由于我无咩mood复习，于是就跟咗佢番去痴餐。呢餐係李教授主理，好丰盛，有广东白粥、肇庆棕、加拿大枫蜜涂面包、俄罗斯香肠、百佳鸡、凉拌青瓜，集合咗多地美食啊。餐前仲有北京栗子、小甘薯，好饱啊！饭前饭后都帮李田执嘢，发觉对于衣柜里面嘅衫李教授比李田熟好多啊，执嘅过程中我哋仲整烂咗好多个袋。我哋拿住两大袋嘢喺寒风中艰难咁行番宿舍。

      琴晚真係好冻啊！外面啲树吹到沙沙声，我坐喺下面复习就快结冰啦。今日一早去学工部值班，挣扎咗好耐先起到身啊！着到一只棕咁出去，但係都係好冻，啲风吹埋嚟好刺骨啊。去到学工部就好暖啦，感觉比喺宿舍暖好多啊。仲得知我哋工管有人有offer啦，而且公司都好似几好，好消息，唔错唔错～

      冬天温习真痛苦，继续努力！

      今日一早就爬起身去练习presentation，保安唔肯提前开门——管院嘅保安就係呢样唔好，李田又喺宿舍对我哋嘅ppt作最后嘅努力，于是我哋就喺学院大堂果度声势浩大咁练习，过程中不乏熟悉嘅老师经过，佢哋都惊讶咁问我哋做紧咩。最搞笑嘅係琴晚，我哋喺MBA大楼三楼一个有台有凳嘅走廊度，拿埋部NOTEBOOK嚟练，朱沆老师经过，很是好奇，仲走过嚟问我哋係咪参加哈佛案例大赛，连NOTEBOOK都出动埋。哈哈，佢亦太睇得起我哋啦！今朝我哋係第一组，上去之前我咳到晕下晕下咁，好想训觉。不过上去之后就精神好多，讲得都ok啦，应该係喺3分钟之内讲完咗啦。我觉得老师好似都未进入状态，无咩点理我，我都无理佢，机关枪咁狂扫一轮。我哋组表现唔错，老师都好满意。嗯，我觉得我哋呢个前后对比都係做得唔错嘅。老师仲表扬我哋节省咗2分钟，唉，我哋删得几痛苦先得嘎！反正呢项工作总算告一段落，不过跟住又有新嘢继续忙啦。

      听日六中校运，我同李田番去哦！睇下新教学楼同新网球场～

      今日——准确嚟讲应该係琴日搞咗一日嘅标致，点击咗无数网站啊。虽然有贵人相助，有咗比较清晰嘅思路，但係要吹成文章，自觉都係应该再了解多啲。研究咗一下广州标致，顺带又研究咗一下东风标致，再顺带追溯到佢哋嘅老爹法国标致。哇，不愧为欧洲第二大汽车制造公司啊！连中文网页都毫不逊色啊，喺果度download嘅一个关于标致history嘅PDF文件，由百几年前讲到而家，图文并茂，令人叹为观止啊！反观我哋嘅广州标致，10几年前姐，但係资料就少之又少啊～今日意外搜到一个word文档，里面有我哋渴望已久但係遍寻不着嘅些许数据，我兴奋不已！再花费咗好大力气寻找其出处，竟然係华工某硕士班工程经济学嘅课件，ft。。。虽然比较搞笑，但係到时无其他嘅话都要用嘎啦。

      晚上食饱饭，帮契妹佢哋答咗一下疑，都係啲高一化学、数学问题，虽然年代久远，但幸好都俾我混过去了。期间佢哋见到我做嘅嘢——搜下网站再整理下资料，觉得比佢哋果啲功课简单好多、有趣好多，好生羡慕。佢哋籍此问咗我好多关于高考、大学嘅嘢，又问我X科考咩——其实我已经讲过好多次，我话物理，佢哋再次崩溃了，不过而家自己想起都有啲不可思议，鬼使神推就报咗；又问大学学咩，我随便吹咗一下。佢哋仲无意撇到我嘅课程表，一个星期只有三次课？？！！又抱怨咗一番。唉，我当年都数学过，物理过，化学过嘎，有边个唔係咁过嚟嘎；正所谓家家有本难念的经，我而家又何尝好。我而家就好郁闷啦，唔想做但又唔可以唔做。。。其实大家唔需要互相羡慕，羡慕唔会改变现状，只会徒添伤悲。。。

 

       做手术啦，做手术啦，仲有几个钟就要做手术啦～bless～

      帮未来boss做完嘢，琴晚boss请食饭，饭台上面有佢以前嘅学生、而家嘅学生同埋未来可能嘅学生。未来boss真係几好人，课堂上嘅佢同私底下嘅佢真係好唔一样，同学生都几倾得埋，几会为学生设想。佢老公都係好人一个，成日会帮我哋打圆场，唔会令尴尬嘅场面出现，而且佢哋都几恩爱啊。饭台上其中一个师兄而家喺中航人力资源部做嘢，哈哈，真係巧啊！

      话咁快，今日已经係10月嘅最后一日啦。回想起开学以后嘅呢个几月，无做咩轰轰烈烈嘅事，但係就做咗一个改变命运嘅决定——与其话係我自己嘅决定，不如话係上天安排俾我嘅命运，我一向都好珍惜上天对我嘅眷顾嘅，今次都唔会例外。有人话保研嘅过住猪一样嘅生活，其实我唔中意人哋成日咁讲。讲笑咁讲一两次无所谓，但係唔中意成日喺身边提住，我哋都唔係真係咁得闲姐？！家家有本难念嘅经啊，我哋2年后都唔知咩环境啊。嗯，反正我係唔会俾自己太得闲嘅！

      随住时间嘅推移，我已经逐渐接受咗保研呢个事实——虽然学校仲未通过，未最终落实，心情亦都无当初咁矛盾啦，都无咩点想，舒服好多。而且已经开始我嘅班工作，呢几日全情投入搞奖学金评定，今日终于搞掂啦！原来真係好鬼烦，要求多多，又唔可以出错。呢排好多人都话我保研一定好得闲，但係我就一啲都唔觉得喔。其实我有好多嘢要做，导师嘅嘢、班里面嘅嘢都唔少。我又为自己计划咗唔少嘅做，成日都会有件事喺度，所以就感觉一啲都唔得闲啦。有人话保研係过住猪一样嘅生活，我点都会係一只勤力嘅小猪啦！

      哈哈，今日飞鸿去咗华工参加保研面试。佢好劲，加上又有我哋院嘅首席博导推荐，马上就被录取咗啦！讲真，佢面试嘅果条案例题虽然都係老生常谈啦，但係我一时都唔可以好有逻辑、好pro咁组织啲嘢讲出嚟，但係佢就讲得头头是道啦。嗯，其实佢比我更适合做研究啊！我可能只係比佢更识考试同埋更有运气而已。另一方面，听讲学院保研嘅名额多咗，飞鸿好大可能可以保中大啊！我可能又同佢做同学啦！即係话而家佢有双重保障，一定可以读研啦。唔知点解，呢样嘢令我感到好兴奋，程度绝对超过得知自己可以保研。呵呵，我而家反而觉得读研好有意义啊，之前嘅担心都显得有少少多余啦。原来人真係需要有同伴嘎！

      今日亦都接咗一个job，帮同学写策划。好耐无正经写过嘅啦，好惊做唔好，不过我会努力嘅！佢好好人，俾好好嘅报酬我，我唔可以辜负佢对我嘅信任嘅！

      其实琴日就出咗成绩啦，不幸地，我总分第二，咁即係话，我又面临选择啦。虽然唔係最终结果，因为仲要公示同埋上报学校审批，但係排第二嘅机会都比较大。当我见到其他人因为保到兴奋不已；又有人因为保唔到好失望，甚至为此落泪；有同学差少少，佢去同老师争取多一啲名额。但係我确实无法用欢欣嘅心情接受，再兴奋咁同大家宣布。

      回想起当日面试，苏先生一句声都无出，只係面色比较难睇。其他老师首先围绕住果个我最难以启齿嘅问题一轮炮轰，然后就係一轮专业问题嘅狂轰滥炸，直到我唔识答为止。反正我就有果句讲果句，亦无话咩掩饰。其实我最希望嘅结果就係去试下面试，然后唔得，咁就可以安心揾工啦。所以我虽然面试果阵有啲紧张，出嚟之后就无咩啦，照去洗牙，番屋企。难道真係天意？上天都觉得读研对我最好？从琴日开始我都喺度考虑，我係顺应天命啊，定係逆天而行呢？其实90%都应该唔会主动放弃嘎啦，只係不断咁说服自己，等自己坚决啲姐。不过好奇怪，我白天会觉得读研都唔错，但到咗晚黑我又开始恐惧啦。唉，讲出嚟真係惊俾人打死啊，不过我又确实係为呢个而烦。

      睇过坤少嘅留言，我都有同感，而且正正係我考虑同埋感觉痛苦嘅问题啦。2年时间，机会成本的确几大。再讲，我最唔想做嘅就係国企（比较传统嘅果种）同公务员，所以我都唔知硕士文凭到时究竟能够有几大嘅作用。而最重要嘅係，我唔係咁中意读研究生，我唔中意研究，我中意实践。琴晚我一边写果份申请，一边觉得好痛苦，越想越觉得唔适合自己。我用咗差唔多10个钟先写完果1000几字，唔係因为我谨慎认真，而係我无咩真心话好写。其实我係为咗众人嘅果句“试下”而决定试下嘎，小敏话：唔应该为咗人哋，应该为自己啊，要拣自己中意果样。唉，无论拣边样，我都怕自己会后悔，就係咁矛盾。

      经过一轮挣扎，今日已经将啲材料交上去。想通咗，都骑虎难下啦，就硬住头皮上啦，等个天嚟决定啦！读书姐，10几年都咁读啦，2年又算咩！最多到时揾唔到工，各位朋友多多关照哦，嘻嘻。不过比较唔正常嘅係，当我见到其他人嘅成绩、科研文章——好强喔，我心里面竟然有少少开心，好变态啊！我而家唔係好惊苏先生咯，只係怕到时十问九唔知，自己无面之余仲失礼我嘅导师哦！

      今日开学啦！但係今日白天都无课，只係夜晚去咗上选修。

      开始睇关于申请保研嘅嘢，觉得要求都几高。各方面收风，面试果时嘅英文部分提问部分会由苏先生负责（关于苏先生，有好长一段故，有啲朋友知道，反正我对佢既内疚又恐惧又憎恨，好复杂）。听到呢个，我嘅心已经凉咗一半，我一直好怕面对佢，而且係要用我最唔擅长而又係佢比较擅长嘅英文沟通，我死啦。。。有一个问题，我最惊佢问我，而佢又好大可能问我，因为呢个问题同研究生有比较大关系，但係无论我点答，都係我理亏。既然下定决定，就去试下咁啦。

      今晚计终合测评嘅加分，个天成日都好似同我玩咁。我成绩高嘅时候，加分又少；等到我加分多啦，成绩又唔够高。睇嚟我都係永远拿二等嘎啦。

从琴日开始就有一件事令我好烦啦。。。琴日李田同我讲，我保研分数嘅学习成绩果部分好好，比较有希望保研，佢叫我争取。天啊，我而家要考虑一个从来都无考虑过嘅问题，我真係唔知点算啊！

听佢讲保研分数由三部分：学习成绩40%，面试40%，社团活动和科研成果之类的20%。之前大家都无咩了解，我认为学习成绩果部分嘅算法应该同奖学金嘅差唔多，所以我觉得自己无咩机会。而我又怕辛苦，就唔打算考研啦。所以，我一开就只有一个想法：揾工！我做所有嘢都係为揾工做准备嘅，例如买衫、实习。点知，而家先知计分方法係算必修课90分以上嘅门数，咁我就得排名比较前，好似好有机会咁啦。虽然以前都有排名第一嘅保研失败嘅例子，但係毕竟係个机会啊，把唔把握好呢？面试要问有关专业嘅知识同埋英文，我就真係无咩信心，社团活动就仲有少少，至于科研成果，原本可以有嘎，但係因为某啲原因，而家无啦——算啦，唔好提啦。所以我觉得后面果60%无咩把握。唉，原来只有一条路，好简单，而家就突然变咗分岔路，搞到我好乱啊！

要我去报名申请、面试都好容易，其实我都好想去尝试下，毕竟都係一个经验，就算衰咗我都唔会好伤心失望。但係万一成功咗我就真係读研？究竟适唔适合我呢？对我有几大帮助呢？呢个係我考虑嘅关键，因为我都几向往出嚟做下嘢。但係咁多人咁辛苦都係为咗读研，我有机会摆喺面前都唔去争取，係咪好唔应该呢？如果我成功咗，读完我又会唔会后悔呢？如果我放弃唔争取，以后又会唔会后悔呢？係咪学历高啲真係会好啲呢？我一直就问自己呢啲问题，但係都无咩答案，好烦啊。

当日琳琳都喺度，佢同李田都叫我争取，佢哋都有唔同嘅理由。天啊，烦死朕啦！我真係好想去面试，体验下，但係又唔知之后。。。 我都唔知自己想点啊！