11/8/2008
最近主要係工作
事情仲係咁多，人仲係咁少，又撑咗两个星期。我感觉自己慢慢开始进入状态啦。
我会从公司嘅角度考虑问题，认为同果廿几个员工终止合同係合理嘅。发通知书当日心里面真係好唔好受，虽然唔係我嘅决策，但我就充当一个刽子手嘅角色，唉，咁嘅时世，真係难为佢地啦。
好多人成日埋怨学不能致用，我就啱啱相反，我觉得学嘅远远唔够我用。或者咁讲啦，现实嘅情况往往具体好多复杂好多，学校学到嘅係一种思维方式、一种处事态度，课本老师教嘅只係一个框架、一个思路，实际工作中思考嘅问题要全面得多。
以前以为上过几堂课就好了解劳动合同法，而家先知道自己如此可笑。里面每一句话用得好就係生机，用唔好就係陷阱，企业同劳动者就如博弈，以前企业係强势，但而家国家要保护劳动者，劳动者嘅维权意识亦越嚟越强，所以企业真係要步步为营，尤其係国企。我家阵都只係懂得啲皮毛，要好好研究啊。
经过四个月嘅锻炼同沉淀，尤其係近一个月嘅小鬼充龙王，我觉得自己对呢个职业开始有啲感觉啦，亦都越嚟越喜欢啦，我会坚持落去嘎！
Tools 
Help
